Parlamentario Shailiny Tromp-Lee (MEP):
Dia internacional di Hende muhe ta un dia pa nos refleha riba nos accionnan pa kita cualkier prehuicio

Dia internacional di hende muhe ta un dia cu nos tur mester tuma pa refleha riba e hende muher, su aporte, su balor y tur loke un hende muhe ta ofrece. Riba tur nivel, den famia, como educador, como profesional, como lider, enfin tur tur tereno y den diferente rol. E tema di e aña aki a enfoca riba un aspecto cu ta toca cada un di nos. Pa nos cuestiona profundamente, ki parcialidad (bias) of descriminacion cada un di nos por tin, hasta inconcientemente.

Un mundo unda igualidad ta reina, ta un mundo mas husto. Cu mas libertad, mas progreso, mas dialogo y un mundo unda hunto ta progresa. Ta un hecho cu mundo a cambia y ta cambiando riba kico ta e posibilidadnan y e rol cu cada uno ta aporta y cu esaki no por ta limita na bo genero. Pesey ta importante pa nos kibra cu “bias” scondi cu nos por tin ainda. Si ainda inconcientemente ta pensa cu no, esey un hende muhe no por haci, anto abo tin pa tuma accion y trece cambio pa esaki.

Awe, 8 di maart 2022, ta Dia Internacional di Hende Muhe. Ban celebra esaki cu un reflexion propio. Mas ainda, compromete bo mes pa tuma accion, no solamente pa detecta parcialidad of prehuicio pero pa elimina e pensamento descriminativo cu kisas bo a lanta cune y sin sa bo a bin ta biba aden. Nos tur tin di aporta pa mehora nos mundo pa nos tur por biba den e mundo di igualdad, progreso y libertad cu tanto nos ta desea.

Alabes riba e dia aki ta bon nos recorda e lucha incansabel cu a ser hiba pa e hende muhe por a adkeri derechonan laboral y social, pa asina nos por a alcansa un sociedad mas husto y cu igualdad den posibilidad. Un lucha caminda hasta hopi bida a keda perdi. Durante añanan a bin ta lucha pa e hende muhe por ehempel por a haya derecho di voto y derecho riba salario y condicionnan laboral igual. Aspectonan cu awentempo mas ta haya atencion ta e parti di violencia contra y abuso di e hende muhe. Esaki sigur ta necesario y como pais nos mester sigui atende pa por elimina e situacion indesea y castigabel aki.

Pero ami sigur ta uza e dia aki pa reconoce otro hende muhenan den mi bida. Hende muhenan cu di un manera of otro ta inspira mi, ta motiva mi y cu diairiamente ta forma parti di mi desaroyo y progreso. Mas y mas nos mester sostene otro hende muhenan den ki posicion of rol cu nan ta. Asina nos ta bay sigui logra mas igualdad di genero aki na Aruba. Feliz Dia di Hende Muhe Aruba. Laga nos tuma tempo pa bishita e diferente actividadnan cu tin riba e dia aki.