Partido MEP:
Riba dia internacional di hende muhe partido MEP
TA GRADICI PROME MINSITER PA TUR LOGRO DEN SU GOBERNACION

8 di maart ta Dia Internacional di Hende Muhe. Aruba a conoce un desaroyo grandi di hende muhe den posicionnan prominente den e ultimo añanan. Den Partido MEP tin diferente hende muhe ocupando posicionnan clave den Partido, Parlamento y den Gobierno. Nos tin diferente hende muhe den Directiva. Y tambe nos Partido tin 3 Parlamentario femenino. Nos Partido tin Minister di Finansa y Cultura femenino. Y desde 17 di november 2017, Partido MEP a marca historia di nos pais momento cu Lider di MEP, señora Evelyn Wever-Croes a bira e prome Prome Minister femenino di nos pais. Y na 2021, atrobe e ta marca historia como e prome ‘votegether’ femenino den historia politico di nos pais.

Nos Lider di Partido, un ser femenino balente y luchado pa e bienestar di nos pueblo, a goberna nos pais marca pa crisis tras di crisis. Un hende muhe para firme den su sapato y determina pa vence tur reto cu nos pais a wordo confronta cu ne.

Prome cu 13 di maart 2020, Lider di MEP y Gabinete Wever-Croes a logra trece nos finansas publico riba e rumbo di stabilidad despues di 2 aña di gobernacion despues di a haya un situacion financiero bastante dificil causa door di e gobierno di AVP. Bou liderazgo di señora Evelyn Wever-Croes, Gabinete Wever-Croes a atende cu e retonan social y financiero cu tur prioridad poniendo e ser humano central.

Despues cu Covid-19 a dal nos pais, como Lider di nos pais, señora Evelyn Wever-Croes, hunto cu su gabinete, a lora manga y cuminsa traha ainda mas duro pa saca Aruba for di e crisis aki tambe. Awe nos ta wak fruto di su maneho durante Covid. Un maneho responsabel cu a pone Aruba como ehempel pa varios pais den region y pa paisnan den Reino. Sin miedo el a enfrenta situacionnan hopi dificil tumando desicionnan firme y duro pero si necesario pa sobrevivi e crisis di mas grandi cu Aruba a pasa aden.

Nos Lider, e prome Minister President di Aruba, e prome ‘votegether’ femenino di Aruba, ta sigui traha. Ta sigui lucha pa nos pueblo recupera di e crisis di Covid. Poco poco, Aruba ta saliendo for di e crisis. Y nos lo bay bek na e normalidad nobo y recupera. Esaki bou liderazgo di un ser femenino cu tin su curason na e luga corecto pa lucha pa e pueblo aki.

Riba Dia Internacional di Hende Muhe, Partido MEP ta gradici Prome Minister Evelyn Wever-Croes, pa cada logro, pa su lucha pa Aruba recupera di e crisis aki y pa guia nos pueblo pa un Aruba cu un economia mas fuerte y mas resiliente.

Tambe Partido MEP ta gradici tur hende muhe di Partido cu di un of otro forma ta trahando pa Partido y ta duna di nan tempo pa engrandece nos Partido.

Partido MEP ta felicita tur hende muhe na Aruba riba un dia especial aki na unda cu e ser femenico ta wordo honra pa tur loke nan ta contribui na dje pa e desaroyo di nan famia, sociedad, pais y mundo henter.