Parlamentario Shailiny Tromp-Lee (MEP): no tin motibo valido pakico oposicion a vota contra Presupuesto Supletorio 2023

Ayera nos a trata y aproba Presupuesto Supletorio di Pais Aruba di 2023. Un presupuesto cu no tin ningun motibo valido pakico oposicion no por a sostene y aprob’e. Sigur si nos mira nan pasado y custumber. Pero e realidad ta otro.

E Presupuesto Supletorio trata ayera tabata e di dos cu a keda entrega pa Gobierno di Aruba. E presupuesto supletorio ta trata cambionan riba e presupuesto 2023 cu Parlamento a aproba na november 2022. Ahustacionnan den entre otro entrada, gasto y inversion.

E cifranan macro economico presenta ta indica cu nos recuperacion ta bayendo miho cu a keda proyecta. Esaki nos por a lesa tambe caba den e prome Presupuesto Supletorio cu nos a haya y den e Najaarsnota cu Gobierno a entrega na Parlamento dia 20 october 2023.

Un di e cambio mas remarcabel den e di dos Pesupuesto Supletorio ta cu e surplus di 1% inicialmente proyecta aña pasa a conoce un aumento di 0,9%. Mester bisa cu esaki sigur ta resultado di e recuperacion acelera di nos economia danki na e crecemento fuerte di nos turismo, banda di e budgetdiscipline manteni pa Gobierno y e plan fiscal implementa. E 1,9% ta representa Afl. 58.8 miyon extra na entrada cu Gobierno a genera.

Cumpliendo cu norma, mitar di e suma aki ta bay pa paga debe y e otro mitar Gobierno lo inverti.

Gobierno a base di conseho, di un comision institui special pa esaki, a stipula den cua proyectonan e placa aki ta bay keda inverti. Esakinan ta entre otro inversion den: un edificio pa Juliana School na Paradera (Afl. 6.7 miyon), ampliacion di localidad pa Mavo/Havo Mon Plaisir (Afl. 2.6 miyon), renobacion di brandweer post Airport (Afl. 4.8 miyon).

Nos no ta unda nos kier ta, pero nos ta riba e bon caminda. Un gradicimento grandi mester keda duna na Gobierno di Aruba y tur e profesionalnan cu a haci e logro aki posibel.