Parlamentario Alvin Molina (MEP): Aruba ainda no ta unda mester ta

Parlamento di Aruba a trata presupuesto supletorio 2023

Aruba no ta unda e mester ta, ainda tin pobresa, criminalidad, “bullying” na scol y trabou y e situacion social falta pa ta saludabel. Nos tur ta desea un aparato gubernamental unda cu tur departamento ta brinda un servicio optimal. Nos tur ta desea pa nos muchanan por crece den un ambiente sano y sigur y cu tin cuminda riba mesa. Nos tur ta desea un Aruba sin sushedad riba caya, cu placa ta yega pa cumpra comestibel den supermercado y cu tur ciudadano por haya e oportunidad pa eleva nan nivel social/economico. Nos tur mester sigui traha hunto pa logra esakinan.

Di otro banda, mirando e abismo (teribel) di unda nos ta bin y e situacion ideal cu nos kier logra, ta bon pa nos realisa cu tin progreso. Kisas e progreso no ta bay mes lihe cu nos ta desea of cu pueblo kier mira. Sigur e proceso pa sali for di e situacion horibel aki no ta uno facil. E ta rekeri trabou duro y sacrificio.

Pa mi, como Parlamentario ta importante pa mira cu nos ta saliendo for di e abismo y cu tin progreso. Ta responsabilidad di Gobierno di Aruba pa percura cu tin progreso y ta nos trabou como Parlamento pa dialoga cu gobierno tocante e progreso y unda mester di adaptacion. Nos por mira cu tur minister a demostra cu tin progreso den e cartera cu ta resorta bou di nan. Den e dianan nos dilanti nos lo reuni extensivamente riba presupuesto 2024, unda cu lo trata e maneho di cada ministerio pa aña entrante.

Pa conclui, e presupuesto supletorio ta resultado di e bon maneho di e gobierno aki. Cerando aña 2023 mi ta gradici e ministernan di Gabinete Wever – Croes II y e profesionalnan pa nan trabou duro, vision y colaboracion.