Parlamentario Shailiny Tromp-Lee: poco poco e ciclo presupuestario ta keda optimalisa

Diamars, 12 di december 2023, nos a inicia cu tratamento di presupuesto di Pais Aruba pa aña 2024. Mi a inicia mi desertacion indicando cu mi ta haya na su lugar pa subraya e hecho cu ta pa di dos aña cu Gobierno ta entrega e presupuesto di pais Aruba na temp, esta nos mas tarda cu prome dia di september conforme articulo V.12 inciso 2, di nos Constitucion. Un presupuesto cu ta cumpli cu normanan existente y pa di dos aña consecutivo conoce un surplus di 1% di nos GDP. Esaki sigur ta indica cu Aruba ta hibando un maneho financiero responsabel y cu trabounan grandi ta keda realisa mirando e impacto grandi cu e pandemia tabatin y e desaster financiero cu AVP a laga atras.

Banda di esaki mi a enfatisa e hecho cu nos como Parlamento tambe ta cumpli cu e ciclo door di trata e presupuesto prome cu aña caba. Aña pasa nos a trata Presupuesto 2023 na november 2022 y awor den december nos a cuminsa trata presupuesto 2024.

Esaki sigur ta algo cu mester ta e patronchi normal y structural cumpliendo na mes momento cu ley. Mi a enfatisa cu mi ta positivo y convenci cu poco poco cumplimento cu e ciclo presupuestario ta keda mehora y por cuminsa draai manera mester ta. Sigur ta remarcabel cu e aña aki nos a conoce diferente ampliacion den raportahe di parti Gobierno caminda na un miho manera y sigur mas trempan durante di aña ta informa Parlamento di cambio- y desaroyonan mara na e presupuesto cu nos a aproba inicialmente. Raportahe manera Voorjaarsnota, Najaarsnota, y Presupuestonan Supletorio. Raportahenan cu sigur ta di balor agrega pa e funcion di control cu nos como Parlamentario mester ehecuta y cu ta brinda mas transparencia financiero y responsabilisacion di parti di Gobierno di Aruba.

Adicionalmente Gobierno a cuminsa haci entrega di e jaarrekeningnan pendiente pa control door di Algemene Rekenkamer Aruba (ARA) pa asina nan por sigui cana nan caminda y yega pa tratamento na Parlamento.

Nos no ta unda nos mester ta, pero nos ta riba e bon caminda. Muestra di trabou duro, structural y e compromiso di parti di Minister di Finansas, sra. Xiomara Maduro pa hiba un maneho financiero na beneficio di nos pais y nos hendenan.