Entrevista di Siman : Parlamentario Darlaine Guedez-Erasmus ta destaca e importancia di Trabou Boluntario

ORANJESTAD, Aruba, 13 di december 2023: Den cuadro di Dia di Trabao boluntario, durante un combersacion cu Parlamentario Darlaine Guedez-Erasmus, miembro di Fraccion di MEP, a explora su profundo compromiso y afinidad pa cu trabou boluntario, subrayando e importancia di e trabou aki den e sociedad Arubano.

Sra. Guedez-Erasmus, por comparti kico ta e conexion personal cu bo tin cu e trabou boluntario?

“Mi conexion cu e trabou boluntario ta bin for di mi raisnan den e ambito social. For di hoben, mi ta envolvi den diferente actividad comunitario, y mi a presencia di cerca e impacto positivo cu e esfuersonan boluntario por tin den bida di hende”.

Con e experiencia den e ambito social a influencia bo perspectiva como Parlamentario?

“Mi experiencia den e ambito social ta fundamental pa compronde e necesidadnan real di comunidad. Traha directamente cu hende den diferente situacion a duna mi e oportunidad pa trece nan experiencianan den Parlamento. Mi ta kere firmemente cu e trabou boluntario ta un enlace vital entre e legislacion y e realidad diario di hende”.

Kico bo ta pensa ta e papel di trabou boluntario den e desaroyo di Aruba?

“E trabou boluntario ta hunga un papel crucial den e desaroyo sostenibel di nos isla. E ta contribui na reenforsa e lasonan den comunidad y, loke ta mas importante, ta trata e necesidadnan specifico di e Arubiano y tur cu ta biba na nos pais. No ta solamente un cuestion di duna tempo; e ta un inversion den e bienestar di nos comunidad y den crea un futuro mas solido pa e generacionnan binidero.

Trabao boluntario ta yuda esnan involucra pa enfoca tambe den no solamente ta involucra den yuda, pero tambe den nan mesun desaroyo salud mental y fisico”.

Con abo ta wak e colaboracion entre gobierno y organisacionnan di boluntario?

“E colaboracion entre gobierno y organisacionnan di boluntario ta esencial. Mester tin un dialogo constante pa compronde e necesidadnan, identifica areanan pa mehora y traha hunto pa implementa solucionnan efectivo. Gobierno por duna e guia y structura necesario, pero e organisacionnan di boluntario ta trece e pasion y conocemento directamente di e comunidadnan cu nan ta sirbi. Por ehempel, mi ta mira un proyecto manera Aruba Doet cu ta bayendo bon tur aña. Chikito y grandi ta participa y ta duna bon fruto”.

Tin algun proyecto futuro relaciona cu trabou boluntario cu kier comparti?

“Mi ta trahando riba iniciativanan legislativo cu ta fomenta y sostene e trabou boluntario. Ademas, mi ta coopera di cerca cu diferente organisacion pa establece programanan cu ta trata desafionan specifico den nos sociedad. Nos kier crea un ambiente unda trabou boluntario ta ser alcansa y ta gratificante pa un y tur. Banda di esaki, el a menciona e plataforma cu ta ‘www.arubavolunteers.org’ cual ta haya sosten di CEDE Aruba. E ta un plataforma hopi actual caminda cada persona por wak den cua categoria e ta identifica cu ne. Eynan tin proyectonan pa temporadanan specifico y tambe pa termino largo of cortico, a bisa.

Darlaine ta sinti cu tin mester di mas plataformanan asina na Aruba?

“Si, mi ta kere cu mester bin cu mas ideanan. Un cu ta hala mi atencion hopi ta un proyecto di Hulanda cu ta ‘Burendag’, Dia di Bisiña y cu ta tuma luga den luna di september. Hopi biaha ta den mi curason pa organisa un actividad asina na Aruba. Un bario tin hopi influencia y mester duna nan forsa pa bisiñanan traha hunto.

Boluntarionan na scol tambe lo por yuda inculca e trabao boluntario y e parti di socialisacion cerca e muchanan for di chikito cu proyectonan manera bishita cerca casnan di nos grandinan, entre otro, locual lo reenforsa nan norma y balornan”.

Pa resumi, Parlamentario Darlaine Guedez-Erasmus ta subraya e importancia di trabou boluntario como un forsa pa motiva e desaroyo di Aruba. Su compromiso cu e ambito social y su bista riba un colaboracion efectivo entre gobierno y e organisacionnan di boluntario ta premira un futuro unda e comunidad Arubano lo florece, danki na e esfuersonan conhunto di su hendenan.