Parlamentario Marco Berlis (MEP): Marco Berlis a entrega un mocion pa baha e prima di pensionado

Dialuna Parlamento a trata e ley di Presupuesto Supletorio. Esaki tabata e ultimo reunion publico pa loke ta trata e leynan di Presupuesto Supletorio pe aña 2023. Diferente raportnan di CAft, IMF, EBA y CBA a subraya cu presupuesto 2023 tabata cumpliendo cu e normanan, a wordo entrega na tempo, ta declara cu economia ta bayendo bon, cu clima di inversion ta e miho den Caribe, y cu e economia y finansas na Aruba ta riba hopi bon caminda. For di akinan sigur mi kier a felicita gobierno pero sigur tambe tur profesional cu a traha duro pa pone tur rapport, documento, verslag y e ley hunto pa asina por a completa e ciclo di e presupuesto 2023 exitosamente.

Mocion entrega pa baha e prima di pensioen di nos grandinan

Durante e reunion publico sr. Marco Berlis a presenta y entrega un mocion pa e prima di pensioen di AZV wordo baha. Den su discurso sr. Berlis a expresa cu e economia di Aruba ta mehorando, e fondonan social di nos pais tin overschot y ta stabil y cu e grandinan mester sinti e efectonan positivonan aki. Como cu nos pensionadonan ta esnan cu ya a aporta henter nan bida na nos finansas y economia, ora cu oportunidadnan presenta pa yuda nos pensionadonan, nos mester por realisa esaki. E mocion a gosa di un conseho di votacion positivo di parti minister Dangui Oduber, cu a declara cu nan ta sondeando y lo ta bay ta trahando riba e deseo di e mocion aki.

Mocion pa yuda nos grandinan a wordo rechasa pa AVP, MAS, Accion21 y Gerlien Croes

Pa motibonan incomprendibel oposicion hungando otro wega politico, menos sr. Santos do Nascimento, a vota contra e mocion aki. Un mocion cu sigur lo por yuda nos grandinan tin mas espacio financiero y gosa di mas placa den nan cartera. Gerlien Croes cu a demostra di hiba un politica destructivo sin contenido, tambe a vota contra sin mustra un krenchi berguensa. Gerlien ta hunga un politica den cual e ta simpelmente bisa cu tur loke gobierno haci ta malo y ta vota absolutamente tur cos, aunke nan ta bon pa pueblo.”Gerlien ta parce di ainda no por encontra su propio identidad politico ainda,” y keto bay ta usa strategia AVPista cu ta afectando su credibilidad enormemente.

Mocion na beneficio di nos grandinan por bira un realidad na 2024

Mirando cu e mocion presenta pa sr. Marco Berlis a disfruta di un stemadvies positivo, nos grandinan lo por wak e efecto di esaki caba den 2024. Minister sr. Dangui Oduber a vocifera cu e lo sondea y haci tur esfuerso pa por haci e mocion aki un realidad. Den e reunion publico di dialuna minister Dangui Oduber tambe a expresa cu e lo subi e pensioen di nos grandinan un biaha mas pa 2024 cu 3%. Esaki lo ta di cuater biaha cu minister Dangui Oduber lo ta subiendo pensioen pa nos grandinan.

Como Parlamentario sr. Marco Berlis ta aporta cu solucionan concreto pa nos grandinan cu merece solamente e miho. Sr. Berlis lo ta pendiente pa wak con e desaroyo di e mocion aki lo cana y concretisa su mes y lo update pueblo riba cualkier novedad.