Parlamentario Marco Berlis (MEP): Oposicion hungando un rol destructivo pa nos pais Oposicion ta votando contra tur inversion di gobierno y beneficionan pa nos grandinan y deportistanan.

For di dialuna Parlamento tabata druk cu yen di reunionnan tratando e dos leynan di mas importante di nos pais cu ta e ley di Presupuesto Supletorio di2023 y e Presupuesto 2024. E leynan aki ta grandi y ta cubri cada aspecto di e maneho financiero y economico di e pais. Por ehempel, e pakete di e ley di Presupuesto ta bin tambe cu Raad Van Advies su conseho, CAft su rapport riba e presupuesto, contestacion di gobierno riba preguntanan di Parlamentarionan, e ta describi e gastonan di gobierno, inversionan di proyectonan, informacion riba e cumplimento di e normanan financiero, proyeccionan financiero cubriendo varios aña, y mucho mas.

Presupuesto 2024 cumpliendo cu e normanan

CAft den un rueda di prensa recientemente a bisa cu hopi claridad pa henter pueblo scucha cu nan ta hopi contento cu presupuesto 2024 pasobra e ta cumpli cu e normanan. Adicionalmente CAft a remarca lo siguiente den nan rueda di prensa:

• Economia di Aruba ta hopi fuerte y ta bayendo den bon direccion.
• Turismo a recupera y kibra cifranan y recordnan di 2019.
• Pronostico pa crecemento economico pa 2024 ta 3%.
• Presupuesto a wordo entrega na tempo y ta presenta un surplus di 1%.
• Debe nacional di Aruba a baha na 83% di nos GDP na 2023.
• Inversionan mester sigui den pais (Esaki ta bay sosode cu un Afl.25 miyon adicional cu gobierno ta bai inverti na 2024).

Oposicion ta vota contra tur desaroyo positivo cu presupuesto 2024 ta brinda pueblo

Ta mas cu claro cu oposicion ta keda practica e filosofia “destructivo” pa vota contra tur cos cu ambos presupuesto supletorio y presupuesto 2024 ta brinda pueblo. Aki ta sigi algun inversion y beneficio cu nan a vota contra:

• Oposicion cu excepcion di sr. Santos do Nascimento, a vota contra sr. Marco Berlis su mocion pa baha prima di AZV di pensionadonan, asina tratando na aporta un beneficio y alivio na pensionadonan di por disfruta di mas placa den nan cartera. Esaki a sosode durante tratamento di Presupuesto Supletorio.
• Oposicion a vota contra e desaroyo di educacion y contra dos scolnan nobo.
• Oposicion a vota contra 15 proyecto nobo cu ta un inversion di Afl. 25.1 miyon.
• Oposicion a vota contra surplus di nos pais cu ta pagando nos debe nacional cu nan mes a crea.
• Oposicion a vota contra e renobacion di Guillermo Prospero Trinidad na Dakota.
• Oposicion a blokia y vota contra e Afl. 7.2 miyon cu SABA mester pa paga su empleadonan y tambe pa por sigui opera. Pueblo ta corda con varios colega di oposicion manera Marisol Lopez Tromp y Mervin Ras cada rato tabata papia di SABA y a hasta graba dilanti SABA pa hunga politica? Wel, nan a vota CONTRA e inversion necesario pa SABA. Mi mester bisa mas? Mi ta kere pueblo a compronde mi.

E ta lamentabel cu oposicion ta keda hunga un politica y filosofia destructivo pa nos pais. Un politica cu ta troce, gaña, huña, y mord’e pa trata na gana algun voto atraves di vocifera mentira structuralmente. Mientras tanto nos gobierno a lora manga for di 2017 pa cuminsa trata cu e megadebe y desastre financiero cu horcan Mike Eman a laga atras y pandemia di Covid-19 a exigi.

Gobierno den su presupuesto a sa di cumpli cu normanan estableci segun CAft y a demostra disciplina presupuestario. Desaroyo y inversion ta e ordo di dia apesar di e crisis existente, gobierno responsablemente ta pagando riba e debe nacional mientras cu e proyeccionan den presupuesto 2023 y tambe 2024 ta demostra un biaha mas cu ya na 2027 nos lo por logra baha e debe nacional na 70% di nos GDP y algun aña despues na 60%. Mi tin di splica mas?

Un elogio na gobierno ta na su lugar cu apesar di dos crisis financiero, e logranan aki ta e fruta y evidencia cu ta sigurando Aruba su recuperacion completo den futuro cercano.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!