Minister Wever tocante 5G: Un paso importante pa yega na un era digital nobo pa Aruba.

Minister di Asunto Economico, Comunicacion y Desaroyo Sostenibel, mr. Geoffrey Wever, a duna aprobacion pa un oficina di consulta Hulandes pa duna un conseho tocante e tarifa aplicabel husto pa operadornan di telefon celular, cu ta Setar y Digicel, pa cu e uzo di frecuencia pa sistemanan di telefon celular cu tecnologia di 5G cu lo mester bira parti di e beleid nobo.

Den e mundo di telefon celular, tecnologia nunca ta para keto y keto bay innovacion ta tumando lugar. Esaki a manifesta su mes den e tipo di telefon mobil, bateria y antena, frecuencia di transmision y recepcion, tipo y capacidad di informacion y aplicacion cu e telefon celular por maneha. Tambe den e stacion base di sistema mobil ta keda bin cu innovacion pa crea mas capacidad pa bos, audio y video y cantidad di usuario.

For di 1G te cu 4G, cu tempo a keda aplica diferente generacion di telefon mobil. Awor nos ta na porta di implementacion di e di cinco generacion (5G). E sistema di 5G ta priminti di tin mas capacidad, ta mas lihe, y ta mas sigur cu e sistemanan anterior. E caracteristanan di 5G no solamente lo sostene e demanda creciente pa comunicacion mobil, pero tambe lo habri caminda pa aplicacionnan innovativo, y conexion cu por ser uza pa maneho di aparato- y machinnan moderno.

Compara cu e sistemanan anterior, e sistema di 5G ta rekeri uzo di mas frecuencia. Por papia di mas o menos dies biaha mas hopi. Compara cu e tarifa actual, cu ta mas bien basa riba frecuencia cu ta core den e ordo di 10 MHz, operadornan di celular lo tin cu paga sumanan mucho halto na Gobierno pa 5G.

Pa segura un prijs (internacionalmente) competitivo pa implementa 5G y mester laga un oficina di consulta, escogi despues di un destaho publico, haci un estudio y investigacion y propone un tarifa husto y aceptabel pa e sistema 5G na Aruba.

Segun Minister Wever esaki ta un paso importante pa yega na un era digital nobo cu oportunidadnan tecnologico y inovativo nobo pa Aruba.