Parlamentario Marco Berlis (MEP): Miguel Mansur kier pa Aruba bira mescos cu Boneiro 

Durante di tratamento di e Presupuesto 2024 riba diahuebs anochi un biaha mas nos por a contempla y scucha e actitud y palabranan barbaro di sr.Miguel Mansur. Despues di su ausencia pa un dia y mei na e tratamento di e ley di mas importante di nos pais, pasobra cu e la dicidi di tuma vakantie y lora den sneeuw enbes di bin traha, Mansur a cuminsa compara y gaba con miho Boneiro ta cu Aruba y cu nos pais mester ta mas manera Boneiro.

Reflexion di e comparacion di Mansur entre Boneiro cu Aruba

1. Mansur a bisa cu na Boneiro, cu ta provincia di Hulanda desde 2010, lo bay conoce un aumento di e salario minimo na juli 2024. E salario minimo lo wordo aumenta di $1.236 pa $1.750 y cu Hulanda ta bay inverti miyones awo pa yuda e Bonerianonan. Esaki ta punto di hustificacion cu Mansur ta menciona, sinembargo loke e no ta bisa ta lo siguiente: (1) Ora Boneiro a bira provincia di Hulanda, su moneda, e florin a bira dollar. (2) Prijsnan a cambia di 1 florin pa 1 dollar, pero salarionan a djis wordo dividi pa e balor di dollar y ciudadanonan di Boneiro a perde den un solo decision di Hulanda como 70% di nan poder di compra. Esaki Miguel Mansur ta desea pa Aruba?
2. Desde cu Boneiro a bira un provincia Hulandes, tin mas Hulandes ta biba na Boneiro cu Boneriano mes, ya cu cos a bira barata pe Hulandes biba na Boneiro pero pe Boneriano tur cos a bira caro. Esaki Mansur kier pa Aruba?
3. Boneiro a bira un provincia na 2010 y durante e tempo aki Bonerianonan a perde mayoria di nan negoshi cu a wordo cumpra pa Hulandesnan, a perde terenonan, casnan, y pobresa extremo a dal Bonerianonan. Esaki Mansur kier pa Aruba?
4. A tuma 14 aña pa Hulanda realisa cu mayoria Bonerianonan ta den pobresa? Kiermen pa 14 aña Bonerianonan mester a sufri pobresa na man di colonialistanan, cualnan a tarda 14 aña pa instala comisionnan di Tweede Kamer cu a keda den “shock” pe pobresa structural na bin haya na Boneiro? Esaki Mansur kier pa Aruba?
5. Salario minimo lo subi na Boneiro. Corda si ta salario minimo so ta subi, esaki no lo yuda Bonerianonan sali di pobresa. Ke hubo di e otronan cu ta lucha y cu ta gana net riba e salario minimo? Nan lo haya un ayudo? No! Esaki Mansur kier pa Aruba?
6. Tweede Kamer di Hulanda a instala comisionnan Thode y Nibud, cualnan a haci un investigacion pa averigua cua ta e suma cu e pueblo di Boneiro mester minimal. Kico nan a constata? Un hogar cu ta consisti di un mayor soltero y cu tin dos yiu, ta perde 2/3 parti di su entradanan na gasto basico. Un pensionado soltero ta perde mita di su salario na gastonan. 
7. E Comision di Thode y Nibud a bin constata cu e “uitkeringnan” ta catastrofico abao. Mayoria di hende na Boneiro cu ta pober “tin trabao normal.” Pero pasobra e salario minimo a keda demasiado abao pa mucho tempo y e costo di bida ta demasiado halto, esaki a causa cu aunke e hendenan ta traha nan ta keda pober. Esaki ta loke Mansur kier pa Aruba?
8. Den e mesun rapport tambe ta mustra cu 1 di cada 3 Boneriano ta den pobresa. Esaki ta loke Mansur kier pa Aruba? Ya bo sa e contesta.

Pueblo awor ainda ta kere cu e Boneriano a bay dilanti como provincial y decisionan descabeya di Hulanda? Absolutamente cu no. Hulanda ta trata e Boneriano como un tweederangsburger y ta exactamente esey Mansur ta desea pa Aruba. Despues di a wak su actitud recien atrobe, uno masha bergonzoso den cual Mansur a lastra clero catholico y insinua cu nan ta homosexual, ataca religionan Cristian y nan liderazgo y creyentenan, lastra, insulta y malusa e Palabra di Dios, ainda bo por kere cu algo decente y serio por sali di Miguel Mansur? Ya bo sa e contesta.Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper