Noticia

Parlamentario Marco Berlis (MEP): Kico ta ideologia di genero (Parti 3)

E ideologia destructivo cu ta invadiendo nos comunidad atraves di un agenda scondi

E ideologia di genero ta un ideologia cu ta cuminsa cana ora cu e matrimonio di mesun sexo wordo aproba na cualkier pais. Atraves di e aprobacion di e ley aki, e activistanan ta bay exigi hopi otro derechonan cu ya ta wordo duna na otro paisnan y cu lo mester wordo concretisa a traves di mas leynan. Ideologia di genero ta un movemento agresivo cual ta enfoca y kier indoctrina nos yiunan, y duna nan derecho y haci nan independiente di e mayornan riba un edad masha hoben mes. Un edad cu ta inadecua pa un mucha dicidi riba su mesun curpa y identidad sexual. Esaki no lo bay sosode den un of dos paso, pero ora wak kico tur loke ta sosodiendo na paisnan manera Hulanda, Canada, Merca, Europa, y Sur America sin conta otro regionan, nos tin motibonan serio pa ta preocupa.

Advertisements

Leynan di ideologia di genero ta kita autoridad di mayornan pa dicidi riba nan yiunan

Den un articulo di dia 10 di januari 2022 y cu a wordo “updated” 10 di februari 2023, ta wordo describi kico ta pasando por ehempel na e estado di Washington na Merca. Na Washington nan a pasa un ley den cual un menor di edad di 13 aña bay ariba tin e derecho y autoridad pa cambia su sexo pa medio di operacionan sin cu e mayornan tin algo di bisa. E consecuencianan di menornan tumando decisionan asina grandi ta teriblemente grave y catastrofico segun expertonan medico y di salud mental. Na California a pasa un ley cu hasta un mucha di 11 aña por a transiciona den un sexo diferente. Na 2023 Spaña a pasa un ley cu ta legalisa muchanan di 12 pa 14 aña por cambia nan sexo cu autorisacion di hues, y muchanan entre 14 pa 16 aña por haci esaki sin un evaluacion medico of di un psicologo. Esaki ta unda activistanan kier hiba e ideologia di genero aki na Aruba.

E peliger grandi di “Puberty Blockers”

Puberty blockers ta otro fenomeno “normal” awor den e mover di ideologia di genero. Puberty blockers ta: “medicamento pa stop e efecto hormonal den un mucha cu ta cuminsa den su pubertad”. Por ehempel si un mucha homber kier puberty blockers pa stop su desaroyo masculino manera cambio di stem, stop crecemento di barba y crecemento di su parti intimo e ta tuma e tratamento aki.  Sinembargo e tratamento aki ta peligroso y tin su riesgonan:

  1. E medicamento usa como “puberty blockers” ta e mesun medicamento hormonal cu ta wordo usa pa “castracion kimico” di pedofielnan. Castracion kimico di pedofielnan ta wordo usa na Francia, Inglatera, Rusia, Poland, Belgica, Turkia y Nort Macedonia. Ainda bo ta kere esaki ta safe pa usa riba nos muchanan chikito?
  2. Activistanan di ideologia di genero ta usa y ta promove e uso di e puberty blockers mientras cu nan no ta informa clientenan riba efectonan devastador cu esaki por tin pa nan salud. Aunke tin poco data, si tin algun efectonan secundario estableci den rapportnan di expertonan. Den un rapport cu mi tin, cu ta basa riba mas di 50 rapport y 300 experto manera psicologo, dokter, psiciatra di mucha, psiciatra y specialistanan medico, mi ta menciona algun di e efectonan devastador cu lo por tin riba e muchanan:
  • Puberty blockers por ocasiona cu na final di nan pubertad nan por cuminsa experiencia “osteoporosis.” (Biggs, 2021)
    • Cierto investigacionan a conclui cu e puberty blockers lo tin efecto riba funcionnan cognitivo.( Anacker, Hough, Bellingham 2021)
    • E tratamento hormonal di puberty blockers por laga e mucha infertil. (Cheng 2019, Schwartz & Moravek 2021)
    • E falta di desaroyo di e organo sexual como efecto di puberty blockers lo por ocasiona cu e no lo por disfruta di e acto sexual. (Gil-Llario 2021)
    • E organonan ta keda ne tamaño y desaroyo di pre-pubertad, cu ta dificulta un operacion pa cambia e sexo. (Van de Grift, 2020)
    • E tratamento y su efectonan riba stem y otro nan ta irreversibel. Si un mucha kier cambia bek na su sexo original e ta keda perhudica.
    • Pa mucha muhenan cu ta tuma dosis halto di e tratamento tin riesgo halto pa enfermedadnan cardiovascular y cancer. (Alzahrani, deBlok 2019, Hanby 2023)

Pronto mi lo continua informa pueblo riba e tema den otro edicion.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!