MINISTER ENDY CROES A REUNI CU SARPA AIRLINES PA DIALOGA RIBA E POSIBILIDAD PA E PROYECTO “SPORT JET”

Pa sigui promove e desaroyo di deporte en general.

ORANJESTAD: Recientemente, Minister Endy Croes a reuni cu gerencia y propietarionan di Sarpa Airlines. Presente na e encuentro tabata Sr. Jose Gregorio Ostos, Sra. Nathaly Arbelaez gerente commercial y Sr. Erick Fernandez consehero. Sarpa Airlines ta un compania Colombiano cu su base di operacion na Aeropuerto Internacional El Dorado Bogotá y na José María Córdova Medellín. Sarpa Airlines tin mas di 40 aña manehado avion comercial, “air ambulance” y charter. Tambe e linea aereo Sarpa tin varios contrato cu e ekiponan profesional di futbol na Colombia y pafo di Colombia. Sarpa ta transporta e hungadonan for di aeropuerto pa aeropuerto, unda e weganan nacional y internacional ta tuma luga. Den cuadro di esaki, gerencia di Sarpa Airlines a duna un presentacion di con nan ta opera y/of funciona. Minister di Deporte Endy Croes tin e vision cu un dia lo kier logra un contracto cu un aerolinea, unda cu nos deportistanan di seleccion por sali na un manera mucho mas facil y yega directamente e luga di competencia y bin bek. Esaki tanto pa e weganan di fogeo y otro intercambionan, por ehempel, ora e deportistanan bay train na un di e islanan di Caribe. Minister di Deporte ta busca e conexion a base di e plan y vision cu e tin. 

Sarpa Airlines a duna un presentacion encuanto e plan aki, cual ta den un fase inicial ainda. Minister Endy Croes a keda di provee data y informacion manera, cuanto ekipo ta biaha pa aña y cu e destinacion ta entre 2 ora pa 2 ora y mey. Den e prome kwartaal di 2024 Sarpa Airlines lo presenta un oferta. Minister Endy Croes a indica cu lo busca e hermandad entre Gobierno di Curaçao y Gobierno di Aruba si ta desea di participa den e proyecto aki. Pa hunto por carga un tipo di “sport jet” pa promove e desaroyo di deporte en general. “E ta un soño, e ta un plan y e presentacion ta riba mesa. Tin trabou pa haci pa finalmente nos evalua si e ta factibel”, Minister Endy Croes a finalisa.