Politica

Parlamentario Shailiny Tromp-Lee (MEP): Oposicion ta keda recuri na manipulacion, malinformacion y gañamento

Mas mi scucha oposicion papia, mas ta keda accentua cu nan no tin argumento y nan mester recuri na manipulacion, malinformacion y gañamento. Y ni cuanto nan haya splicacion, documentonan, cifra y hechonan, toch ta ple sordo y ciego pero lastimamento mudo no.

E retorica di oposicion di keda ripiti nan no por cuantifica, ni den cifra, ni den e realidad generalistico eyfo. Pasobra realidad ta cu cosnan ta bayendo den bon direccion. Porta no mes lihe cu nos ta desea pero e desaroyonan ta positivo y ta brinda speransa y perspectiva. Desaroyonan ta miho cu paisnan den regio y nos economia a recupera na un manera accelera.

Advertisements

Cu nos pais tin reto ta un realidad, y for di 2017 nos Fraccion a bin ta señala esaki. Cu algun di nos famianan tin retonan strcuturalmente tambe ta un hecho, veld social a subraya esaki debidamente na Parlamento den 2018/2019 durante nos rondanan di consulta. Realidad ta tambe cu pandemia a bati na nos porta y su impacto pa nos pais tabata y ta devastador. Y asina mes oposocion cada biaha kier haci comosifuera pandemia nunca a yega na nos pais.

Y awe AVP, cu ta e arkitecto di e Mega Debe y crisis social, ta sinti’e yama pa cuestiona. Nan tin corahe! Un cos ta sigur, nan ta maestro den crea debe pero sigur no por fiha con nos ta bay paga pa nan. Tampoco nan tabatin e habilidad di crea balans y a lubida barbaramente di e hende durante 2010 pa 2017.

Sigur si nos wak nan postura durante reunionnan mi asta ta sinti e necesidad di bisa cu mi no sa pakico nan ta haci pregunta. Pasobra nan no ta lesa of scucha e contesta cu nan ta haya riba esakinan, tampoco ta analisa of lesa documento poni ter inzage of presenta na nan. Pero mi ta convenci cu no ta cumbini nan pa compronde y ripiti.

Mi ta kere cu pueblo mester realisa ken nan ta. Nan no kier para pa nos pais. Nan no ta para pa un trato husto y similar cu rumannan den reino. Ta un berdadero lastima cu nan no por bisti e petchi di Aruba y ta persisti di tene esun di nan mesun persona of di un partido na prome lugar. Pasobra ni con bo kier mira e situacion, ni con bo kier beneficia di e powerplay di Hulanda, ni con bo kier ataca y menosprecia Gobierno: Para berdadermente pa bo pais, para pa bo hendenan!