Parlamentario independiente mr. dr. Ryçond Santos do Nascimento: Presupuesto 2024 ta yiu di CFT y Landspakket

Mi a vota PRO pa e presupuesto 2024. Hopi hende automaticamente a sinti cu esey ta nifica cu mi a bira MEP. Ta politica tradicional a crea e sentimento ey den un pais cu desde nos Status Aparte ta den gara di politica tradicional. AVP y MEP a secuestra e mente di hopi ciudadano cu e pensamento cu nan ta e unico solucion. Pero, ta hustamente e mentalidad aki ta un problema grandi, pasobra e tin nos pais stanca politicamente y economicamente.

Sentimentalismo tradicional tin nos pais pega den un monopolio politico. Nan kier pa bo sinti cu bo ta berde y geel. Pero democracia tey pa e ciudadano ta liber bao di un identidad nacional y no partidista. E ciudadano tin un parlamento cu mester ta bos di pueblo y no di partido. P’esey Parlamento ta supose di duna direccion na gobierno. Pero na Aruba desde 1986 ta e ministernan ta manda riba parlamentario y ta partido ta partido ta manda riba gobierno. E parlamentario cu kier tin un futuro politico mester baha cabez pa e partido. P’esey nos sistema politico ta kibra.

Mentalidad tradicional tin nos finansas publico estanca. Nunca, desde nos Status Aparte, Gobierno tabatin su administracion financiero na ordo. Poco biaha a entrega un presupuesto na tempo, mayoria di biaha e presupuesto tabata un fantasia y practicamente nunca Gobierno a produci un cuenta anual na tempo. P’esey hopi corupcion por a tuma luga. Mientras Gobierno a hinca Pueblo den debenan astronomico, el a yena e aparato gubernamental cu campañado y a percura pa proceduranan keda pega den tempo. P’esey nan por a bende permiso, ontheffing y tereno comercial pa yena caha di partido y nan cartera personal.

Ta e tradicionalismo berde-geel a bin cu demasiado camber di hotel, sin tene cuenta cu e tipo di trabao cu hotelnan ta crea. Trabaonan cu ta sepera mama di nan yiunan, trabaonan cu ta horta hopi oranan di e trahado y trabaonan cu ta mantene hopi hende pega din un situacion social sin salida.

E decadencia politico, economico y financiero a bira asina grandi cu ta parce cu Dios mes a permiti nos sufri e concecuencia den forma di perdida di parti di nos autonomia. Na 2015 nos a haya supervision financiero y desde fin di 2020 nos tin Landspakket. Como cu nos Parlamento a faya den su trabao di controla Gobierno, awo Hulanda ta controla Gobierno pa medio di supervision financiero y e Landspakket. Pa nos sali di e situacion precario aki, nos mester drecha e manera cu nos ta goberna e pais aki. Esey ta cuminsa cu entrega presupuestonan na e momento cu nos Constitucion ta stipula y cu un surplus. Nos entrada na impuesto mester keda mas halto cu nos gastonan, pa mata e necesidad pa crea mas debe.

Presupuesto 2024 a ser entrega na tempo y tin un surplus. Presupuesto 2024 ta refleha un colaboracion intenso entre Hulanda y Aruba. Presupuesto 2024 ta subraya e necesidad pa Aruba eleva su nivel di gobernacion si nos kier recobra nos autonomia. Esey no ta haci e presupuesto perfecto, pero un bon comienso. Vota PRO e presupuesto aki ta haci mi persona un ciudadano cu a los for di e pensamento tradicional AVP-MEP.  Un persona cu ta haya nos himno, bandera y idioma mas importante cu e colornan berde cu geel. Un persona cu ta cansa di un politica tradicional cu ta uza sentimento di hende pa crea un devocion na e partido y un expectativa cu ta e partido ta salba nos pueblo. Un persona cansa di e secuestro emocional y mental di nos ciudadanonan y cu kier un reforma profundo pa asina nos recobra nos autonomia mas fuerte cu nunca. Pasobra cada un di nos mester sinti y pensa pa e futuro. Esey ta nos responsabilidad pa cu nos mes, pa cu nos yiunan y pa cu nos nietonan.