Comite Olimpico Aruba y Team ARU a logra den 2023 e mihor resultado den historia di nos deporte.

Un cantidad record di 21 medaya logra den dos weganan grandi na cua a participa den 2023 cu na final a paga cu un galardon premio Panam Sports Awards 2023 como e mihor Comite Olimpico Nacional (CON) cu menos di 1 miyon habitante. Ta kiko mas nos kier? Aña 2023 sin duda tabata uno fenomenal pa Comite Olimpico Arubano y nos atletanan di alto rendimento. A surpasa tur expectativa cu e record di medaya den e Weganan Centro Americano y del Caribe na San Salvador, El Salvador, y den e Weganan Panamericano na Santiago, Chile. Nunca antes den historia di nos deporte di alto rendimento nos atletanan a logra conkista asina hopi medaya den e weganan. No mester lubida cu prome cu e Weganan di Veracruz na aña 2014, ta 1 of 2 medaya nos por a logra durante henter e ciclo. Esaki ta bisa hopi di e adelanto di e trabou duro cu exito desplega pa tanto nos atletanan hunto cu nan coachnan, e mayornan, e federacionnan deportivo y Comite Olimpico Arubano den su totalidad. Cada granito cu a aporta a yuda yega na e exito historico aki. WEGANAN CAC, EL SALVADOR Cu un total di 16 medaya conkista, e delegacion di Aruba cu e competi na e Weganan di Centro Americano y del Caribe San Salvador 2023 a logra pone un stempel den e buki di historia di nos deporte local. Nunca antes Aruba a gana asina hopi medaya den un evento cu pa nos ta wordo considera como e “Weganan Olimpico” ya cu ta e centroamericano y del caribe ta nos weganan unda nos ta bataya cu esnan mas cerca di nos. For di e prome dianan caba ora cu artistic swimming y landamento a cuminsa conkista medaya uno tras di otro, e sentimento cu algo grandi lo pasa durante e weganan aki tabata un cuestion di tempo. Team ARU a biba momento di soño na El Salvador sin lubida tambe Santo Domingo, e subsede di e weganan. Nos atletanan a ricibi hopi elogio pa nan prestacion sublime. Den casi tur disciplina cu a competi a logra medaya. Mas cu claro e bon trabou di e coachnan tambe mester wordo menciona. A traha duro den conhunto pa logra lo maximo pa Aruba. Nos atletanan a logra surpasa e cantidad di medayanan logra den historia di e Weganan CAC. Na 2014, Team ARU a logra conkista 4 medaya, mientras cu na 2018, Team ARU a conkista 9 medaya. Awor na 2023, Team ARU ta conkista 16 medaya cu ta casi dobbel na 2018. Aruba ta finalisa na di 12 lugar na Weganan ESA2023 di un total di 35 pais participante. A logra un total di 16 medaya esakinan den: 1. Landamento cu dos medaya di Oro y cuater medaya di Plata y un record di e weganan den 50 m Pecho Masculino – Mikel Schreuders (27.51) 2. Bowling cu un medaya di Oro. 3. Landamento artistico cu dos medaya di Plata y cuater medaya di Brons. 4. Sailing cu un medaya di Plata. 5. Taekwondo Poomsea, cu un medaya di Brons. 6. Ciclismo BMX cu un medaya di Brons. JUEGOS DE PLAYA SURAMERICANO SANTA MARTA E delegacion di Aruba a competi den e Beach Games Suramericano unda Aruba a haci un bon papel den e beach tennis femenino. E duo a keda net cortico pa e medaya di Brons ora cu nan ta keda na un di cuater lugar tras di Chile. WEGANAN PANAMERICANO SANTIAGO 2023 E weganan Panamericano, Santiago, a bay den forma fenomenal pa Aruba su delegacion na Chile. Nos dushi isla ta haci historia na e ciudad di Santiago, Chile, den e 19 edicion di e Weganan Panamericano cu no menos cu 3 medaya conkista. Na Chile, Aruba a participa cu 14 atleta den 8 disciplina deportivo. E deporte di vela a logra obtene un resultado historico pa nos dushi isla cu dos medaya di Plata y dos clasificacion Olimpico Paris 2024. Den e disciplina di iQFOiL, e regatista Ethan Westera a logra medaya di Plata y un clasificacion pa e Weganan Olimpico di Paris 2024. Un otro atleta cu tambe a sobresali tabata Philipine van Aanholt cu e logra medaya di Plata den e disciplina di Sunfish femenino. Den pasado Philipine van Aanholt a logra medaya di Oro pa Aruba den e Weganan CAC na Veracruz, Mexico 2014. E deporte di combate, Karate tambe a logra gana un medaya di Brons pa Aruba cu e karateka Rob Timmermans. Den e categoria +84 kg masculino, Rob ta gana tres di su cuater peleanan pa keda na di 3/4 lugar unda e ta cay venci den e pelea semi-final contra di Brazil. Den e ronda preliminar Rob ta gana Brazil, Colombia y Nicaragua. Un resultado historico mirando cu karate apenas a conoce nan di dos participacion Panamericano. E deporte di Boliche a keda cortico pa un medaya den individual femenino cu Kamilah Dammers cu a termina na un di 5 lugar overall, un posicion net tras di e medaya. GALARADON PANAM SPORTS AWARD 2023 Pa cu e prestacion sublime di nos atletanan di alto rendimento den 2023, Comite Olimpico Arubano a keda nomina den luna di november pa Panam Sports como un di e mihor comitenan olimpico nacional cu mas logro den 2023 pa un pais cu menos di 1 miyon di habitante. Wel pa nos sorpresa dia 9 di december ultimo durante un evento di gala di Panam Sports na Miami, Florida, Comite Olimpico Arubano ta haya e reconocimento mas grandi cu e deporte di Aruba a yega di ricibi den historia di nos deporte cu e Panam Sports Award 2023 como e mihor Comite Olimpico Nacional cu menos di 1 miyon habitante. Mas cu claro esaki tabata e cherry cu tabata falta ariba e bolo den 2023. Manera ta ser bisa cu nada pero nada no ta cay for di shelo, tur logro ta bin conhuntamente cu disciplina, dedicacion, esfuerso, sacrificio y determinacion. COA ta inmensamente agradeci na tur pero tur persona cu a contribui na e exito grandi aki den 2023, un exito cu nos lo mester bay traha super duro pa surpasa. Multi-medayista di Oro mericano Jesse Owens a bisa esaki: “We all have dreams. But in order to make dreams come into reality, it takes an awful lot of determination, dedication, self-discipline, and effort.” Famia di COA kier a desea Aruba completo felis dianan di fiesta y un prospero aña deportivo 2024. Por cierto, un Aña Olimpico! #TeamARU