AZV ta lamenta e decision di Dr Tim Peterson

Cu sorpresa AZV a tuma nota di e comunicado di prensa di dr T. Peterson, unda e ciruhano ta anuncia di ta termina su contrato cu AZV di inmediato.
Ta asina cu for di momento cu a surgi un conflicto entre dr Peterson y dr Horacio Oduber Hospital (HOH), AZV a haci todo lo posibel pa busca un solucion satisfactorio. Entre otro AZV a ofrece un proceso di mediacion entre partidonan cu e meta pa trece e partidonan hunto. Lamentablemente partidonan no a acepta e proposicion di AZV.

Mester menciona cu AZV ta sostene e iniciativa di hospital pa introduci un reglamento di asina yama vakgroep. E reglamento ta un acuerdo entre specialistanan pa regla e cooperacion entre e mediconan cu ta traha den hospital. Dicho reglamento ta importante pa e calidad di cuido. Calidad hunto cu e accesibilidad di cuido y su eficiencia y eficacia ta netamento e metanan principal di AZV. Tanto AZV, HOH y Inspeccion di Salubridad ta sostene e reglamento di vakgroep.

E conflicto entre HOH y dr. Peterson a conduci cu HOH a nenga sr. Peterson acceso na su salanan di operacion. Conforme e contract cu AZV, e nengamento di acceso ta motibo pa termina e contract. Apesar di e condicion aki den e contract cu AZV, AZV a sigui haci esfuerso pa busca un salida satisfactorio pa su aseguradonan. Asina a aproba un periodo di inactividad cu e meta pa yega na un acuerdo nobo. E realidad di AZV ta cu AZV tin un reto sumamente grandi pa atende cu ne. E situacion financiero di AZV ta sumamente preta y e solucion cu AZV por haya su mes aden ta uno cu no ta costa e fondo di AZV mas placa.

E ultimo proposicion cu AZV a haci ta cuadra cu e pensamento financiero aki. Y awe AZV ta tuma nota cu dr. Peterson no ta acepta esaki y ta scoge pa termina su contrato cu AZV. AZV ta lamenta esaki y na mes momento ta gradici dr. Peterson pa e añanan cu el a duna su servicio na su aseguradonan. AZV ta spera cu ainda den futuro por yega na un relacion di servicio atrobe pa su aseguradonan. Mientras tanto por informa cu HOH ta keda garantisa e servicionan necesario y ta buscando un reemplasante.