Minister Endy Croes: SR. FRANS MAAS VAN DRIE UN PERSONA CU A DEDICA HENTER SU BIDA NA ENSEÑANSA DI ARUBA

ORANJESTAD: Frans Maas van Drie tabata un pionero den formacion di maestronan na Aruba, a fungi como consehero di gobierno riba tereno di enseñansa y a traha na Departamento di Enseñansa como Inspector di Enseñansa. Frans a dedica henter su bida na enseñansa y a logra hopi pa Arubianonan por haya formacion na Aruba mes. Frans a mustra cu nos mes por. Tambe, el a dedica hopi atencion na enseñansa di ofishi, semper defendiendo e studiante y percurando pa e calidad di enseñansa den nos scolnan tecnico (LTS, MTS), administrativo (ETAO, MAO) y Huishoudschool. Ora Aruba a haya su Status Aparte na 1986, e situacion laboral a haya un golpi ora cu Lago a cera y diferente persona a perde nan trabou. Meneer Frans Maas van Drie hunto cu e Minister di Enseñansa di e tempo ey, a cuminsa cu un plan pa yuda e personanan aki na trabou y a funda Enseñansa pa Empleo. E meta di Enseñansa pa Empleo tabata pa implementa un programa di “her-, om- en bijscholing”.

Dia 20 di april 1988 (mas cu 35 aña pasa), Enseñansa pa Empleo a habri su portanan y a cuminsa cu diferente programa pa personanan sin trabou haya e oportunidad pa siña un ofishi nobo. Mayoria curso tabata dirigi riba e trabounan den turismo ya cu e tempo ey ta eynan e cuponan di trabou tabata habriendo. Meneer van Drie a cuminsa e tempo ey como e prome “scholings coordinator” di Eseñansa pa Empleo y a dirigi e instancia aki te cu ora el a baha cu pensioen. Pa conclui, Minister Endy Croes den nomber di Aruba ta gradici Sr. Frans van Drie pa tur e bunita trabou desplega den enseñansa. Danki y cu Frans van Drie sosega na paz.