MINISTER ENDY CROES TA FELICITA SETAR N.V. CU UN EXITOSO Y FABULOSO CONCIERTO DI GALA TRIBUTE 70 YEARS OF CARNIVAL MUSIC

ORANJESTAD: Diabierna ultimo, Minister Endy Croes acompaña pa su kerida esposa Dilailah Croes a atende e concierto di gala Tribute 70  years of Carnival Music organisa pa Setar N.V.  Minister Endy Croes a representa Minister di Cultura Xiomara Maduro na e ocasion special aki. Un anochi di gala unda cu a conmemora e bunita aniversario di Carnaval 70. E meta di e concierto nostalgico aki ta pa crea un coleccion di nos musica di Carnaval y documenta esaki como parti di nos herencia cultural pa nos generacion y futuro generacionnan. Alrededor di 23 cantante a presenta e temanan mas popular y memorabel di nos historia di carnaval. Diferente artista grandi di e tempo ey a presenta e anochi aki, manera Baptiste cu a interpreta e cancionnan di Lord Boxo, Mighty Red di S United, Rusty y Lady K. E cantantenan tabata acompaña pa un tremendo orkesta cu a consisti di musiconan local y internacional bou guia di Sr. Carlos Bislip. Esnan presente sigur por a disfruta di un bunita, magno y fabuloso evento yena cu ambiente y nostalgia.  Pa finalisa, Minister Endy Croes ta felicita director di Setar N.V. Sr. Roland Croes y ekipo completo di Setar cu a prepara e evento aki, un bunita iniciativa cu a hiba tur hende bek den tempo cu recuerdo di e tempo ey te cu aworaki.