DUSHI CARNIVAL GROUP : DUSHI PEOPLE DANKI PA HACI FAKKEL UN EXITO TOTAL.

A pesar di tur contratiempo, DUSHI a sa di pone un tremendo ambiente riba caminda. DUSHI a luci totalmente cu su outfit colorido cu un biaha mas a haci un diferencia durante anochi.

Nos kier gradici nos DUSHI people pa nan pasenshi pa e tardansa cu a surgi. Boso pasenshi, animo y energia a haci cu, a pesar di tur cos, nos tabata sa di pone un dushi ambiente riba caminda. Ta pa boso nos ta hacie.

Djis pa informa nos participantenan, e pruebanan publica ta pa boso sa cu nos como Dushi Carnival Group a cumpli cu tur exigencia. Nos trailer como tambe nos bar a cumpli cu tur rekisito pa garantisa siguridad di nos participantenan pa cual motibo a haya e keuring tambe pa por subi caminda.

Pues locual cu a pasa tabata fuera di nos alcanse. Esey ta e motibo di e tardansa. Pero asina mes di tur skina a yega ayudo. Pa esaki nos ta sumamente agradecido.

Nos ta lamenta cu SMAC, sin informa cu lider di grupo di DCG prome, a dicidi di expresa cu DCG no tin niun papel na ordo, como sifuera cu ta DUSHI ta esun cu a causa e tardansa mientras cu den otro gruponan tambe e mesun problema aki a surgi. E pruebanan publica ta demostra cu DCG su trailer y bar ta conta cu e keuringnan necesario. DCG ta cumpli cu reglanan.

E animo y energia di Dushi People tabata fuerte y grandi suficiente pa pone un grupo bunita yen di ambiente riba caminda.

Cu esaki nos kier bisa si cu DCG ta asumi su responsabilidad y lo percura pa esaki no ripiti.

Nos palabra di danki na KPA, DOW y tur boluntario cu a coopera pa toch nos 750 participantenan por a subi caminda y engrandece Fakkel na gran forma.

Dushi Carnival Group