“Tene A” na MANA

MANA tin e honor di presenta e instalacion “Tene A” di Sharelly Emanuelson kende ta un cineasta y artista di arte visual cu lasonan familiar cu Caribe Hulandes. Sharelly a haya reconocimiento y premiacion pa su instalacionnan cu video, documentarionan y presentacion di su obranan den festival- y institutonan internacional.  Por menciona entre otro e obra Nexus na MoCA Tapei (2023), Document na Rijksmusem Amsterdam (2022) y Mi Pais na Stedelijk Museum Schiedam (2020).  Tambe Sharelly tabata facilitador di Universidad di Corsou, di Sint Maarten, Ateliers ’89 na Aruba y Scholengemeenschap na Boneiro.

Dia di Betico, publico lo tin e oportunidad pa dialoga cu e artista.  Sharelly lo tene 3 sesion interactivo specialmente pa e dia festivo aki. E prome ta pa 10:30, e di dos ta 11:00 y e di tres ta 12:00. Pa motibo di espacio limita ta pidi pa inscribi di antemano, mas tarda dia 23 di januari awor, via telefon 582-8979 pa un di e sesionnan.

Cu “Tene A,” Sharelly ta crea y habri un espacio den MANA, unda e ta invita publico pa mira mundo cu otro wowo, cu ta conduci na combersacionnan diferente. Asina e ta trece mas perspectiva cu e meta pa yega mas cerca di otro. Tambe pa mira reto- y adaptacionnan di awendia na un forma mas amplio. Su meta ta pa despues di “Tene A” sigui cu “Tene B y C” na Boneiro y Corsou.

E instalacion “Tene A” ta un ampliacion di e exposicion “Tene” na Rijksmuseum Hulanda (2023) cu e tema “Sostenibilidad” den Reino Hulandes.  Den “Tene” e artista ta explora e relacion entre e ser humano y su medio ambiente den cuadro di cambio di clima y e impacto di su accionnan diario. Su potretnan a mustra con hende ta anda na diferente forma cu asuntonan manera maneho di awa, erosion y sushi, cu por tin consecuencia grandi of chikito, temporario of permanente.

Sharelly ta sigui desaroya su bista riba sostenibilidad basa riba su investigacion den ehecucion “Biba Dushi den Mal Tempoe”. Ta trata di su investigacion pa PhD den cuadra di e programa “Isleñonan na Timon”. E ta un programa multidisiplinario di investigacionnan cu ta enfoca con habitantenan ta adapta na e cambionan climatologico riba e islanan ABC.

 MANA y Sharelly Emanuelson ta invita un y tur pa pasa na Museo dia 25 januari Dia di Betico entre 10’or di mainta pa 2’or di merdia y hasi uzo di un oportunidad unico pa intercambia cu Sharelly. Entrada ta un sonrisa. Pa mas informacion di Sharelly por consulta su website: www.sharellyemanuelson.com