Minister Maduro a reuni cu Director General encarga cu Aduana na Hulanda, sra. Nanette van Schelven

Aduana Hulanda lo brinda asistencia na e team di maneho di Aduana Aruba

Durante su biahe di trabou na Hulanda den luna di november 2023, Minister Maduro di Finansa hunto cu director di Aduana sr. Ricky Croes a reuni cu e Director General encarga cu Aduana na Hulanda, sra. Nanette van Schelven.

E meta di e bishita tabata pa haci un peticion pa asina por haya asistencia y sosten necesario di Aduana Hulandes pa por fortifica y profesionalisa Aduana na Aruba. Banda di esaki, Minister Maduro a haya e oportunidad tambe pa cera conoci cu e teamnan di maneho di Aduana cu a reuni cu otro den cuadro di e programa ‘Versterking Grenstoezicht’ den Reino Hulandes.

Mester bisa cu e peticion di Minister Maduro a wordo honra y den cuadro di e proyecto di ‘Versterking Grenstoezicht’ e team di maneho di Aduana di Aruba lo ricibi e sosten necesario di e experto di Aduana sr. Jan Kamp kende cu ya caba den e prome siman di aña 2024 a cuminsa cu e trabounan necesario pa fortifica y profesionalisa e Cuerpo di Aduana na Aruba.

Minister Maduro ta gradici e ekipo di Aduana Hulandes lidera pa sra. Nanette van Schelven pa e bon reunion y e cooperacion pa brinda asistencia tecnico na bienestar di Aduana di Aruba.