Castigo di prison plus TBS exigi den caso di abuso sexual
Corte den Prome Instancia a trata awe e caso penal contra e homber C.A.v.A. di 35 aña di edad.
E sospechoso aki ta wordo acusa di tabata as riba hopi mucha muher jong pa haci actonan sexual cu nan. E tabata manda e mucha muhernan mensahenan cu preguntanan si nan kier gana placa of si nan kier sali den un fotoshoot. Ademas di esey e tabata manda nan potretnan di un curpa di homber stijf. Cu otro mucha muhernan e tabata spera nan na nan scol y tabata masturba den nan presencia. Cerca un par di mucha muher el a yega te violacion sexual.
Ademas ta acusa e sospechoso di tabatin sex cu dos mucha muher menor di edad y di tabatin porno infantil den su posesion.
E sospechoso a wordo samina pa un psiquiatra y un psicologo. Nan a constata cu e tin un trastorno psiquiatrico, pa cual e lo mester wordo trata.
Awe fiscal di husticia a exigi un castigo incondicional di 6 aña contra V.A., plus (cu vista riba e conseho di e dos expertonan) tratamiento obligatorio den forma di un TBS cu condicionnan. Esey ta encera cu V.A. lo tin cu sinta su castigo di prison pa despues mester sigui tratamiento obligatorio pa tempo largo.
Huez lo dicta sentencia aki tres siman.
