Communicado na patientnan di dr. T. F. Peterson cu ta cay bou seguro di AZV.

Cu e communicado aki mi ta desea di laga tur patient sa cu mi decision cu mi a haya mi mes ta tuma, no ta di awe pa mañan mi a tume. Mi a hasi todo por todo y duna tur locual mi por a duna pa purba di yega na un acuerdo cu AZV pa asina mi por sigui brinda e cuido na boso.
Mi deseo tabata pa a sigui duna boso e cuido na hospital di Sanicolas, esta Imsan. Mi tin 61 aña di edad. Mi lo tabata tin 4 of 5 aña mas pa por brinda servicio na mi patient nan. Hamas mi a pensa cu mi carera na Aruba lo a caba abrupto manera e la pasa awor.

Mi kier pa boso sa cu mi tabata dispuesto pa entrega un tercera parti di mi budget pa asina duna AZV espacio pa por atrae un ciruhano mas pa hospital di Sanicolas. Hunto cu e budget di e otro ciruhano Arubiano cu nan a core cune, hospital HOH por a haya un ciruhano y e resto, hunto cu e parti di mi budget, hospital di Sanicolas Imsan tambe por a haya un ciruhano. Asina Aruba lo tin 7 ciruhano bek. No ta asina cu AZV lo mester a gasta mas placa, al contrario, ta budget nan di fte’s pa e 7 ciruhano nan cu ta existente y supose di ta presupuesta caba nos ta papiando di dje. Pero ta parse cu AZV no ta desea di mira hospital di Sanicolas Imsan desaroya y brinda aun mas mihor cuido di locual nan ta brindando caba. Cuido cu lo bay pa nan mesun aseguradonan.

Cu Hospital HOH, despues di un lucha largo y amargo, nos no a logra yega na otro. Nan vision di cuido y seguridad pa cu patient ta un otro vision cu esun di ami. Esun di ami por ta anticua manera cu HOH ta bisa, pero ami ta kere y para firme pa brinda cuido personal lo mas tanto posibel. E cuido cu mi ta wordo paga pe. E cuido di mi patientnan nunca tabata na peliger manera HOH kier trece padilanti. Y nan sa esey. Ta simplemente cu mi no por identifica mi mes cu e manera cu nan ta desea di duna cuido.

Dialuna AZV a hasi mi persona un ultimo proposal cu tabata un ofensa no solamente pa ami pero tambe pa Imsan y e balor cu AZV ta duna Imsan como hospital di Aruba y Sanicolas. AZV kier a kita 55% di mi budget pa duna HOH pa nan tuma un ciruhano di exterior den loondienst y duna Imsan 35% di mi budget pa asina Imsan tuma ami den loondienst. (E sobra di mi budget ta wordo kita pavia di bezuiniging, locual ta comprendibel y acceptabel).
Esaki ta un proposal indecente. Mi tin 27 aña ta traha como un ciruhano vrijgevestigd na Aruba. Como un ciruhano vrijgevestigd AZV no ta accepta mi traha na Imsan. Pero den loondienst y pa menos pago cu un ciruhano di exterior si nan ta accepta. Esaki ta un falta di respect pa ami como un ciruhano cu tin mas aña cu e otro ciruhano nan dunando servicio y cu e praktijk mas grandi na Aruba.

Cu dolor na mi curason mi ta dispidi di mi patient nan y desea nan tur cos bon. Mi praktijk ta habri pa si mester busca informacion pa asina por acudi na otro ciruhano. Tambe pa atende patiënten particulier y of cu otro seguro.

Atentamente,
Dr T. F. Peterson.