MIEMBRONAN DI EERSTE KAMER A BISHITA ARUBA DEN CUADRO DI REUNION ANUAL

ORANJESTAD – Siman pasa diabierna Gobierno di Aruba a reuni cu delegacion di Eerste Kamer di Hulanda. E Parlmentarionan di Eerste Kamer ta bishitando diferente isla pa haya mihor bista di kico ta sosediendo. E bishita aki tabata tuma lugar 1 biaha pa aña prome cu Covid, sinembargo pa motibo di Covid nan no a bin mas. Prome Minister Evelyn Wever – Croes conhuntamente cu Minister Endy Croes y tambe Minister Geoffrey Wever a atende e reunion representando Gobierno di Aruba y a keda contento cu e bishita di parti e Parlamentarionan.

Topiconan trata den e reunion
Premier Wever – Croes a splica cu den e reunion a presenta e retonan cu Gobierno di Aruba ta enfrentando. Un di e temanan aki ta e situacion financiero di Aruba. Prome cu e pandemia, e situacion financiero di Pais Aruba tabata bayendo hopi bon, te cu a yega un surplus net prome cu Covid. Lamentablemente, e retonan cu a presenta a consecuencia di covid a bay cu e surplus aki. Prome Minister a expresa gratitud pa e sosten cu a haya di Hulanda durante di e periodo aki, cual a pesar di e condicionnan hopi severo, ta cumpliendo cu nan. ‘Aruba ta comprometi pa recupera di e crisis y pa reconstrui un Pais mas fuerte y resiliente.’
Un otro tema cu a atende cu ne ta COHO y RAFT. Prome Minister a splica e Parlamentarionan di Eerste Kamer di e preocupacionnan cu tin acerca di e leynan aki. Pa cual nan a keda di tene cuenta cu e preocupacionnan aki.
Banda di e temanan aki otro temanan cu a bin dilanti ta combatimento di corupcion, importancia di integridad pa Gobierno y kico tur a haci riba e tereno aki. Entre otro: Bureau Integriteit, trabounan andando pa keda cla cu e tratado contra corupcion, leynan di iniciativa di Parlamento pa screening y financiamento politico, y tambe ombudsman/ defensor di pueblo.
E tema di crisis di Venezuela y e impacto cu e crisis aki tin riba Aruba tambe a bin dilanti. particularmente e situacion di cantidad di personanan cu a pidi asilo, e cantidad di personanan cu ta na Aruba sin documentacion, e impacto cu esey tin riba nos infrastructura, nos enseñansa, cuido di salud, y e ayudo di Hulanda cu Aruba a ricibi. E Parlamentarionan a keda hopi contento cu e informacion.

Preguntanan di e Parlamentarionan
E miembronan di Eerste Kamer tambe a haci varios pregunta. Nan kier a sa por ehempel kico e maneho di energia ta encera particularmente pa locual ta trata combatimento di cambio climatologico y efectonan di esaki. Ademas, nan kier sa den cua area ta bay desaroya nos economia y con ta bay percura pa Aruba bira un Pais mas fuerte y resiliente cu lo por cu otro shock similar den futuro, pa cual a trata e diferente temanan y a contesta tur nan preguntanan, Prome Minister a bisa.

Terminando, Premier Wever – Croes a expresa cu den combersancion cu cada uno individual, nan a duna di conoce cu nan ta contento cu e presentacion y cu esaki ta e mihor presentacion cu nan a haya durante nan biahe. Gobierno di Aruba tambe ta di opinion cu tabata un bon reunion y cu e Parlamentarionan tabata asina receptivo pa scucha. Esaki ta yuda pa por sigui logra cosnan grandi pa Aruba.