Parlamentario Marco Berlis (MEP): Adultonan merece di tin mas oportunidad pa por sigui y caba un estudio riba nivel HBO online

No ta tur hende na Aruba a haya un oportunidad pa por caba un studio MBO, HBO of WO durante nan hubentud. Hopi biaha ora un persona ta hoben e no sa ainda kico exactamente e kier bira como profesional. Tin biaha pa falta di sosten di famia, pa falta di informacion, pa falta di oportunidad, pa cualkier motibo cu por ta, hopi adulto awendia no tin un MBO of HBO diploma. Papiando den pueblo, mi ta wak cu tin un deseo ferviente den hopi adulto pa por conecta cu un estudio MBO of HBO online, cu ta duna nan e flexibilidad den orario, tempo, y gasto.   

Segun CBS, 92% di pobresa na Aruba ta pa via di educacion

Den un reunion di comision di finansas recientemente CBS a duna informacion kico tur ta defini e bestaansminimum y algun otro aspecto di pobresa. Den e reunion aki CBS a splica cu e falta di educacion di nos pueblo riba nivel di MBO y HBO ta 92% di e causa di pobresa. Naturalmente ora un persona ta bon studia esaki ta posicion’e pa por funciona den un trabao cu un pago hopi mas halto cu esnan cu no tin mucho educacion, consecuentemente subiendo su calidad di trabao.

Gobierno mester haci mas pa adulto y hoben adultonan cu kier sigui studia

Aunke gobierno ta afilia cu algun universidadnan den exterior y tambe Hulanda, esaki por ta hopi caro y no accesibel pa e pueblo en general. Tin varios website di universidadnan Hulandes por ehempel cu ta hopi mas flexibel y accesibel pa nos pueblo. Ademas, e universidadnan aki ta hopi mas accesibel financieramente, den nan duracion y orario di studio. Buscando informacion riba e programanan existente na departamento di educacion, mi a constata cu hopi mas mester por wordo haci riba e tema aki.

Preguntanan lansa oficialmente via Parlamento pa Minister Endy Croes

Pa via di e reto grandi aki pa mehora nos sistema di educacion pa esnan adulto y hoben adulto por sigui studia, mi a manda algun pregunta pa Minister Endy Croes riba e tema:

1. Minister por a informa Parlamento si ta trahando riba un sistema di scol cu lo por brinda oportunidad na adulto y hobenan por continua nan studio riba nivelnan di HBO y MBO en conexion cu universidadnan di Hulanda of otro paisnan?
2. CBS a duna un presentacion den comision di finansas, cual ta mustra cu Aruba su motibo principal di pobresa ta conecta cu e falta di educacion avansa den nos pueblo. Ki vision minister tin pa subi e cantidad di profesionalnan studia cu HBO y WO aki na Aruba?
3. Minister mi ta na altura cu departamento di educacion ta trahando cu un universidad online di Hulanda, sinembargo esaki ta hopi caro. Ki otro posibilidad tin, cu ta mas accesibel pa e cartera di nos pueblo, pa nan por sigui studia y haal nan MBO/HBO diploma? 

Esakinan ta algun di e preguntanan pa Minister Endy Croes contesta riba e reto di pa adultonan pa sigui studia pa un MBO/HBO of WO. Manera mi haya e contestacion di minister mi lo sigui informa pueblo.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo Parlamentario y sirbidor di pueblo na bo ordo semper!