Arthur Dowers (AVP): Vacuna Gate a nace y ta biba den Ministerio di Salud

Fraccion di AVP tin atencion pa tur preocupacion den comunidad. Durante un conferencia di prensa cu a tuma luga dilanti di e edificio di Departamento di Salud Publico, parlamentario Arthur Dowers a cuminsa na bisa cu DVG no ta envolvi den ningun asunto ilegal di vacuna.

E parlamentario a bisa cu despues di haci nan mesun investigacion y mira documento, nan a yega na conclusion cu e departamento no ta envolvi den locual nan ta yama e ‘vacuna-gate’.

AVP a compronde cu esun responsabel ta e ministerio di e minister encarga cu salud publico. N’e momentonan aki ta haciendo investigacion riba algun trahado, e ‘pisca chikito y no e pisca grandi’ den palabra den Arthur Dowers.

Mientrastanto, e sistema computarisa aki ta maneha pa un amigo di e minister, e tin acceso na tur informacion priva di pashent. Segun Dowers, ta parce manera cu Ministerio Publico no ta interesa den e investigacion. Awo ta enfoca riba esunnan chikito, pero esunnan mes ta keto bay coordinado di minister.

No ta unicamente na Aruba a comete fraude cu vacuna. Na Hulanda den algun dia pasa polis a actua mesora. Aki na Aruba, a djis scoge pa hala e trahado for di luga. Dowers a continua bisando cu tin hende hopi cerca di e coordinadonan di minister cu tambe ta envolvi, pero a scoge pa no kita nan!

Pa e parlamentario, e caso aki no a caba y ta garantisa cu den e dianan cu ta bin e fraccion berde lo sigui divulga con Gobierno di Aruba ta manipula door di pone un departamento den un luz scur mientras cu desde prome dia mester a bin dilanti y bisa cu no e ta e departamento ta responsabel sino mas bien Minister Dangui Oduber y su grupo den su ministerio.

E asunto aki di Vacuna Gate ta bay mas leu. Si nota con, deliberadamente, a purba tur forma pa kita e director di DVG. El a gana tur su casonan den corte, cu a stroba Minister Oduber den su plan. Kico el a haci? Pone un “management team” cu su mesun coordinadornan den dje pa maneha DVG. Kico nos ta haya awe como resultado? Fraude pisa den cual coordinadornan di e minister mes ta envolvi. Lo no ta straño pa pensa cu esaki mas bien ta parce un organisacion criminal, un cartel, cu e minister ta responsabel p’e den su ministerio. Casi e ta mustra manera un plan, pa tuma control over den DVG, purba maneha vacuna for di ministerio y despues purba laba man tambe ora vacuna na Aruba caba den un fraude miyonario!

Por ultimo, e parlamentario a bisa cu Departamento di Salud Publico ta den un situacion critico. Por a mira cu varios persona cu ta traha den e profesion a dicidi di bandona Aruba debi cu e sistema di salud ta bou presion. Otronan a bay traha cu minister, lagando e departamento desampara, mientras cu ta persiguiendo e director mes pa cinco aña caba. Gobierno deliberadamente no a pone e fondonan necesario pa nos sistema di salud por funciona.