Parlamentario Ricky Hoek (MEP): Marisol ta e reina di ‘gaslighting’ den politica

ORANJESTAD, Aruba 31 Januari 2024: “Si nos analisa e manera di procede di Marisol Lopez-Tromp, nos por saca afo cu e tin un actitud cobarde y manipulativo. Esaki a keda demostra na diferente ocasion durante su carera politico”, Parlamentario di Fraccion di MEP, Ricky Hoek a expresa. 

Marisol di basta tempo ta buscando tur forma pa bagatalisa y kibra e credibilidad di Prome Minister Sra. Evelyn Wever – Croes. Marisol constantemente na varios ocasion ta mustra su frustracion y trauma cu el a keda expulsa dos biaha for di partido MEP (sin agrega cu el a wordo expulsa for di POR tambe). 

Prome biaha ora e tabata Parlamentario di MEP y despues ora e tabata minister den un gobierno di coalicion MEP-RED-POR. Sra. Lopez-Tromp no por procesa e situacion ainda.  Esaki ta haci cu Marisol ta uza e tactica di ‘gaslighting’ pa scapa su mes di su erornan politico. 

‘Gaslighting’ kiermen ora bo ta tira culpa, manipula, culpa otro hende pa kita e atencion for di bo propio responsabilidadnan. Y e tactica aki Marisol ta campeon aden cu e merece e titulo di ‘Reina di gaslighting den politica’. 

Lista di ‘gaslighting’ di Marisol

Na aña 2009 Staatssecretaris Sra. Ank Bijleveld a combersa cu Prome Minister Nelson Oduber pa laga haci un investigacion door di e Wetenschappelijk Onderzoek- en Documentatiecentrum (WODC) di e Ministerio di Siguridad y Husticia di Hulanda. E rason ta pa detecta procesonan dudoso cu ta pasa den gobierno. Marisol no a gusta e idea di e investigacion y esaki tabata un di e rasonnan pakico el a bandona MEP. 

Durante di eleccion 2009 AVP a bin na mando y ta netamente Sr. Mike Eman ta esun cu a firma hunto cu Sra. Bijleveld e peticion pa haci e investigacion di WODC. Den e rapport entre pagina 169-178 por lesa claramente con Marisol tempo cu e tabata Minister di Infrastructura tabata tin procesonan dudoso ta pasa bou di su encargo. 

Esaki nan tabata: 

1) dunamento di tereno erfpacht na particularnan 

2) Bendemento di casnan den Seroe Colorado 

3) Otorgamento di opcion di tereno pa construi hotel y negoshi. Por bishita www.wodc.nl pa haya e rapport “De staat van bestuur van Aruba. Een onderzoek naar de deugdelijkheid van bestuur en de rechtshandhaving”.

Ora Marisol tabata parlamentario di partido AVP, el a gaña y entrega keho falso contra di su colega Dammers. Caminda cu e mes Marisol tabata culpabel. Den e mesun partido AVP, y cu e resultado di e rapport di WODC, Marisol a tapa completamente (te dia di awe) pa su coleganan Sevinger y Croes. E no a entrega keho di corupcion niun dia na OM contra su coleganan. 

Despues cu Marisol a bula cura pa di dos biaha, el a join POR. Den e partido aki el a keda practica su tactica di gaslighting. Pasobra durante caso Diamante e como miembro di directiva di e fundacion di su fraccion di POR, niun dia a entrega keho di malversacion di e fondo cometi pa su colega Howell. 

Den e caso Kukwisa, Marisol mes tabata un sospechoso pa 3 aña largo, caminda e no a sali defende su mes cu e no ta of por wordo considera un sospechoso. Un parti hopi peculiar ta cu OM no a anuncia niun dia cu Marisol tabata sospecho durante di e 3 añanan aki. Esaki ta mustra cu Marisol a haya un trato preferencial riba tur otro politico y cu probablemente mester tin hende cu man riba su cabes. 

Actualmente den su partido MAS, su forma di ‘gaslighting’ a bira mas agresivo, trahando video riba social media bagatalisando diferente hende pa asina e crea un imagen di e politico perfecto, caminda e tin varios ‘strikes’ riba su nomber den su añanan di politica. 

Awor e pregunta clave ta? Ta ken ta culpa otro hende? Ta ken ta manipula informacion? Ta ken ta gaña pueblo structuralmente? Esaki ta Marisol Lopez-Tromp, un politico di hopi aña di experiencia, tanto como parlamentario y minister, cu sa tur ‘ins-and-outs’ di e sistema politico y tambe sector gubernamental, y cu awe ta haya e apodo di “Reina di gaslighting den politica”, Parlamentario Hoek a finalisa bisando.