KVK A TENE SU PROME REUNION CU MINISTER DI ASUNTONAN ECONOMICO

Oranjestad – Diahuebs 1 di februari 2024, directiva nobo di Camara di Comercio y Industria Aruba (KvK) a reuni pa prome biaha cu Minister di Asuntonan Economico, Comunicacion y Desaroyo Sostenibel, sr. Geoffrey Wever. Puntonan di agenda tabata entre otro e Plan Strategico di KvK pa 2024, e problematica di escasez di personal, y e proposicion di Gobierno pa cobra cada turista na entrada un suma di US$35 cu e meta pa yega na un fondo pa traha e.o. un RWZI nobo.

‘Connect’

E presidente di KvK, sr. Kemmerling, a presenta e plan strategico di KvK pa 2024. E palabra cardinal pa aña 2024 lo ta ‘Connect’. Durante e aña venidero KvK lo busca conexion riba tres nivel: cu e comunidad empresarial, cu Gobierno y cu empresanan internacional.

KvK lo enfoca mas riba e comunidad empresarial, y lo scoge topiconan relevante pa traha encuestanan cu e meta pa identifica e problemanan existente cu empresarionan ta encontra. Alabes KvK lo organisa encuentronan cu empresarionan pa por intercambia cu e comunidad empresarial riba e preocupacionnan y ideanan existente. Riba tereno di crea mas conexion cu Gobierno, KvK lo continua cu reunionnan regular cu Gobierno y otro stakeholders, y lo sigui comparti datonan y consehonan na Gobierno riba diferente topiconan relevante. Pa loke ta trata e punto di conecta cu empresanan internacional, KvK lo sigui colabora cu Minister y organisa misionnan comercial pa exterior den e aña aki. Alabes, lo participa, conhuntamente cu Minister, na e ‘Investment Summit’ den luna di maart proximo cual lo tuma luga na Hulanda.

Aparte di esakinan, KvK a expresa e intencion di desaroya productonan nobo y organisa mas workshop y training pa por provee den e necesidad di e comerciantenan pa haya mas informacion y conocemento di cierto aspectonan cu por yuda e compania mehora su operacion.

Preocupacion

KvK a expresa su preocupacion riba e topico di escasez di empleado. KvK a indica cu esaki ta un problema cu ya ta conoci pa hopi tempo, na unda KvK a expresa na varios ocasion su preocupacion riba e topica aki. Den proximo añanan lo bin mas o menos 2800 camber adicional, y no tin suficiente personal pa traha. KvK ta desea di haya informacion di Gobierno tocante e accionnan concreto cu lo tuma pa soluciona e problema aki, y alabes mitiga e consecuencianan si importa cantidad grandi di trahadonan for di exterior.

Un otro topico riba cual a dialoga ta e proposicion di Gobierno pa cobra un tarifa di US$35 na cada turista na nan entrada na Aruba. KvK ta preocupa cu esaki lo por stroba grupo y/of famia grandi di bishita nos isla. KvK a trece dilanti cu lo tin fondonan disponibel di VNO (Vertegenwoordiging van Nederland) pa yuda soluciona e problema di RWZI. KvK ta di opinion cu si por haci uzo di e fondonan aki, no mester bolbe cobra un tarifa extra na e turistanan, y asina evita di pone un peso extra riba nos bishitantenan.

KvK ta gradici Minister pa e oportunidad di por a dialoga, y ta confía cu lo tin un bon colaboracion y reunionnan regular cu e mandatario pa asina KvK haya e informacion relevante y por duna su aporte y contribui na e maneho di e Minister. KvK lo sigui reuni cu Gobierno y diferente sectornan comercial pa haya feedback y asina identifica e retonan cu ta stroba actividadnan comercial y oportunidadnan pa fortifica nos economia, pa por trece esakinan bao di atencion di Gobierno.