Parlamentario Shailiny Tromp-Lee (MEP): Afl. 5 miyon pa mantencion di caretera y Afl. 3 miyon pa mantencion di edificionan di gobierno

Recientemente Parlamento a ricibi e contestacion di Gobierno riba e preguntanan cu a ser haci por escrito encuanto Presupuesto di DOW pa aña 2024 cu Gobierno a presenta na nos dia 2 di november 2023. Mirando cu ricibiendo esaki nos ta culmina e proceso cu e ley mester cana, di biaha Presidente di Parlamento a yama reunion publico pa trat’e diaranson awor dia 7 di februari 2024 pa 9’or di mainta.

Un punto cu sigur ta resalta den e presupuesto aki ta cu e e Afdeling Beheer en Waterschap di DOW ta bay stop di existi asina cu e responsabilidadnan cu nan ta encarga cu nan keda tuma over door di Utilities. Manera ta conoci Gobierno a tuma e decision pa pasa e responsabilidad di rioolwaterzuiverngsdinstallaties y rioleringsstelsel pa Utilities. E proceso pa concretisa esaki ta bayendo biento en popa y ta premira cu pronto e lo keda finalisa. Tur gasto di personal, organisacion y infrastructura ta pasa completamente pa Utilities. Esaki sigur ta e manera cu Gobierno a logra cu a corto plazo ta bay bin cu e inversionnan necesario pa logra solucionnan necesario y structural pa e problematica cu nos zuiveringsinstallatie.

Door di e decision aki Gobierno ta crea un espacio financiero pa inverti den otro areanan. Gobierno a dicidi cu di e fondonan cu ta bin liber Afl. 5 miyon ta bay pa mantencion di caretera y Afl. 3 miyon ta bay pa mantencion di edificionan di gobierno. Esaki sigur ta un aspecto cu durante e reunion publico en cuestion mi persona ta bay elabora riba dje mirando cu Gobierno a informa Parlamento cu e inversionnan ta bay segun un meerjarenplanning. Mas cu claro mi lo bay pidi Gobierno pa elabora mas encuanto e planning aki y splica kico ta e prioridadnan y con a stipula esakinan.

Ta bon conoci cu durante e periodo di pandemia y despues no ta aloca fondo pa mantencion di caretera y tampoco pa asfalta careteranan di santo. Como Parlamentario bo ta keda constantemente acerca pa cuidadanonan cu peticion al respecto. Pesey mes mi ta bay duna e parti aki su debido atencion. Otro apsecto importante ta e parti di mantencion di edificionan di gobierno y nos scolnan. Manera tur aña un biaha mas mi lo duna e lista aki su debido atencion.