𝗠𝗜𝗡𝗜𝗦𝗧𝗘𝗥 𝗘𝗡𝗗𝗬 𝗖𝗥𝗢𝗘𝗦 𝗔 𝗛𝗔𝗖𝗜 𝗕𝗜𝗦𝗛𝗜𝗧𝗔 𝗢𝗙𝗜𝗖𝗜𝗔𝗟 𝗡𝗔 𝗖𝗢𝗟𝗘𝗚𝗜𝗢 𝗡𝗜𝗚𝗘𝗟 𝗠𝗔𝗧𝗧𝗛𝗘𝗪 𝗡𝗔 𝗦𝗔𝗡 𝗡𝗜𝗖𝗢𝗟𝗔𝗦

Siman pasa, Minister di Enseñansa y Deporte Endy Croes a haci bishita oficial na Colegio Nigel Matthew. Na yegada na e scol, e mandatario di Enseñansa a ricibi un caluroso bonbini. Colegio Nigel Matthew ta e unico scol Havo / Vwo publico na Aruba y tin 551 alumno. Durante e bishita, Minister Endy Croes a reuni cu rector di Colegio Nigel Matthew Sr. Ralph Croes, conrector y wnd. rector Sr. Whitney Kock y conrector Sra. Jasmine Tromp, unda cu a dialoga tocante diferente topico di interes di e scol. Sr. Ralph Croes a duna un presentacion di e scol, e deficiencia y kico nan ta desea di wak mehoracion. A keda palabra cu e staf di Colegio Nigel Matthew lo presenta un lista di prioridad, pa asina Gobierno di Aruba por traha e plan y inverti corectamente pa asina hiba e scol na excelencia maximo y sirbi e alumnonan na e miho manera. Minister Endy Croes a indica cu el a keda impresiona di loke cu a wak y a compromete pa reglamenta loke cu falta. Tambe, Minister Endy Croes a haya un recorido rond di e scol pa mira e lokaalnan, gymzaal y deficiencia den e parti di infrastructura. Ademas di esaki, e mandatario di Enseñansa a bishita e les di e kimica (scheikunde), Papiamento y matematica. Por ultimo, a reuni cu e team di Colegio Nigel Matthew, unda cu nan a haya e oportunidad di haci pregunta y trece nan inkietud- y preocupacionnan dilanti. Minister Endy Croes a contesta nan preguntanan y a duna un splicacion breve di e proyectonan cu ta andando pa mehora e calidad di enseñansa na Aruba. Rector di e scol Sr. Ralph Croes a expresa di ta agradedido cu Minister Endy Croes a bishita e scol pa cera conoci un poco mas di cerca y pone su mes na altura di e situacion. Ademas di esaki, Sr. Ralph Croes ta gradici Minister Endy Croes pa tuma su tempo pa sinta cu e team di e scol pa scucha nan necesidadnan y e bon sentimento cu nan tin pa loke Colegio Nigel Matthew ta brinda na comunidad di San Nicolas y henter Aruba.
Pa finalisa, Minister Endy Croes ta gradici rector Sr. Ralph Croes y e team di Colegio Nigel Matthew pa e caloroso ricibimento, alabes ta desea e docente- y studiantenan un exitoso aña escolar 2023 – 2024.