Noticia

Parlamentario Marco Berlis (MEP): Den 2024 turismo ta keda bati recordnan na Aruba

Na aña 2023 nos pais a experencia un recuperacion excelente di su pilar economico di Turismo. Aña 2023 no solamente tabata e aña di recuperacion di nos turismo, pero tambe a sa di kibra tur record di 2019 cu previamente tabata e aña record den e historia di nos pais. Den cuadro di esaki, recientemente minister di turismo a anuncia e resultadonan di Januari 2024. E bon noticia ta cu Aruba a kibra record di januari 2023! Esaki ta un noticia sumamente alentador y ta demostra cu e strategia, vision y trabaonan di ministerio di turismo, ATA, y e sector turistico ta bayendo den hopi bon direccion. Resultadonan ta demostra un biaha mas cu Aruba ta riba e caminda di recuperacion y ta sigui kibra expectativanan di tur hende.

Advertisements

Resultadonan di nos turismo januari 2024

Aki ta sigui un resumen di e logronan cu ta mustra con e record di januari 2023 a wordo kibra;

  1. Turista cu a yega cu Avion: Esaki a subi cu 18.4%! Un aumento di casi 20%. Un total di 117.172 turista a yega cu avion na nos pais.
  2. Turista cu a yega cu Crucero: Esaki a subi cu 0.35%. Un total di 123.374 turista a bishita nos cu barco turistico.
  3. Largura di Estadia: Esaki a subi cu un total di 10.4%. Un subida basta grandi y impresionante y un factor hopi crucial. Pakico? Pasobra mas largo un turista keda mas e mester gasta!
  4. Cuanto e Turista a gasta; segun Banco Central di Aruba Afl.3.451,60! Esaki ta un aumento di 15%! (Q1-Q3 BCA)
  5. Cantidad di Anochinan na Hotel: Esaki a aumenta cu 20.5%
  6. Cantidad di Anochinan na Hotel All Inclusive: Un aumento di 12.6%
  7. Cantidad di Anochinan Timeshare: Un aumento di 28.5%
  8. Cantidad di Anochinan na otro camindanan: 38.4%

E resultadonan historico aki den turismo ta fruto di e bon vision y maneho di minister Dangui Oduber, ATA y tambe di tur esnan cu ta traha duro den e sector. Diversificacion di nos turismo conhuntamente cu “upgrading” di producto Aruba ta haci cu nos isla ta keda un destinacion atractivo y resiliente. Resultadonan ta mustra cu e turista ta lagando mas placa atras den nos economia. Esaki ta impacta positivamente tur restaurant, hotel, shopping malls, tours, tiendanan y hopi otro tipo di negoshi mas. Esaki ta sigura cu cuponan di empleo ta sigui crece y ciudadanonan tin mas oportunidad pa haya un trabao of promocion cu ta yuda pone pan riba mesa. E vision incansabel di Gabinete Wever-Croes ta keda demostra cu apesar di a encontra su mes na 2017 cu un pais practicamente den bancarota pa via di e megadebe di Mike Eman, y un pandemia mundial di Covid-19 na 2020, toch a sa den apenas 2.5 aña pone Aruba bek riba su pianan: “pone nos finanzas publico na ordo, paga riba nos debe nacional ya pa dos aña, ta cumpliendo cu tur norma segun CAFT, ta invertiendo den proyectonan nobo.” Tur esaki ta evidencia solido cu Aruba ta recuperando stap pa stap. Pabien Aruba!

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!