Parlamentario Darlaine Guedez-Erasmus (MEP): Stichting Hunto den un edificio y concepto nobo pa atende muchanan y hobennan cu problema di adiccion of salud mental
ORANJESTAD, Aruba 16 di Februari 2024: SPD (Servicio Social Psikiatrico) y FMAA (Fundacion pa Maneho di Adiccion di Aruba) a forma un aliansa pa concretisa loke awe ta conoci como Stichting Hunto.
Den cuadro cu e apertura grandi di e edificio di Stichting Hunto na Dakota, miembro di Fraccion di MEP den Parlamento, Darlaine Guedez-Erasmus, a menciona cu tabata un honor p’e ta parti di e evento importante aki.
El a bisa cu SPD y FMAA a uni forsa pa crea Stichting Hunto pa sigui brinda e servicio completo na comunidad. E ta un proyecto sumamente special pa muchanan y hobennan den loke ta trata salud mental y adiccion.
ย E meta ta pa duna nan e cuido adecua pa nan por sigui progresa den nan bida, desaroya bon, y participa activamente den comunidad.
“Mayornan, mi kier encurasha boso pa haci uzo di e oportunidad aki pa cualkier situacion cu bo por ta aden, cu bo yiu. Cu cualkier pregunta of preocupacion pa acudi na Stichting Hunto. Asina e profesionalnan por yuda bo”.
El a gradici tur esnan involucra, incluso tur e trahadonan, gobierno di Aruba y tur partner pa haci e bunita proyecto aki posibel.ย
