A REUNI CU ASOCIACION TRABAO DI HUBENTUD NA ARUBA (ATHA) DEN CUADRO DI FONDO PA PROYECTO “GEN297” PA NOS HOBENNAN

ORANJESTAD – Recientemente, Minister di Husticia y Asuntonan Social Sr. Rocco Tjon a reuni cu directiva di Asociacion Trabao di Hubentud na Aruba (ATHA) den cuadro di alocacion di fondo pa proyecto “Gen297” pa nos hobennan. ATHA ta un organisacion “non-profit” cual ta basa riba trabounan boluntario y tin como meta pa promove “jeugdwelzijnswerk” na Aruba, den un forma eficiente y efectivo. Pa e motibo aki, a presenta e proyecto di Gen297, cu e meta pa stimula creatividad entre nos hobennan, den forma di un “afterschool program”.

ATHA ta consisti di miembronan di dies diferente sector cu ta comparti e mesun vision cu e organisacion. Cada sector ta traha man den man cu otro pa asina comparti conocemento y informacion den e entre otro e tereno social, hudicial y enseñansa, pa por reforsa e servicio cu ta brinda na nos hobennan. Mirando cu ta trata di un organisacion “non profit” a acudi na Ministerio di Husticia y Asuntonan Social, pa apoyo financiero pa cu e programa di Gen297; un “afterschool program” inclusivo y integral pa asina hobennan, di e edad di scol secundario, por expresa nan creatividad. Tambe, a base di nan propio interes, e hobennan aki lo por desaroya nan mes na un forma optimal como indiviuonan den un ambiente sano, caminda nan ta ser balora y ta wordo trata igual.

E programa aki ta varia di tema y e ta varia pa dia tambe, e ta wordo brinda pa organisacionnan gubernamental y no-gubernamental como tambe pa miembronan di ATHA y no-miembronan di ATHA. “Gen297” ta ofrece diferente trainingnan y cursonan na tur cu ta participa na e programa, cu e meta pa promove funcionamento mas profesional y efectivo. Lo tin trahadonan social den e programa pa hobennan y lo por brinda training di “Sociale Vaardigheden” (SOVA) tambe, si ta necesario. Mirando cu ta trata di un “afterschool program”, nan lo ofrece transporte for di e scol pa “Gen297” y lo ofrece tambe cuminda di merdia, tur dia.

Actualmente, e programa di “Gen297” ta conta cu 30 participante cu ta ubica na Centro di Bario Brazil, sinembargo, e meta ta pa logra habri cinco localidad nobo den un periodo di cinco aña. Ta importante pa añadi cu e idea di Gen297 a nace danki na un estudio di “best practice” caminda a adapta e idea aki for di “Educare Foundation” basa na Los Angeles, USA. Por ultimo, Minster Tjon a expresa cu Ministerio di Husticia y Asuntonan Social ta sostene e proyecto aki, na bienestar di nos hobennan y como tal lo aloca fondonan necesario pa por haci e proyecto aki uno posibel.