Na comienso di e conferencia dedica na Dia Internacional di Hende Muhe 2024: Minister Maduro a sorpresa tur dama cu un serenata di Jeon cantando Miss Dior
Un grupo grandi di dama a bin hunto pa celebra Dia Internacional di Hende Muhe 2024 cu e biaha aki tabata tin e tema, “Inspira inclusion pa Hende Muhe.”
Pa e ocasion aki Minister Maduro tabata tin e honor pa haci e discurso di apertura y a brinda e mensahe: “Inclusion ta cuminsa cu bo mes y den bo mente. No laga nada limita bo. Inverti den bo mes, educa bo mes, desaroya bo mes personal y profesionalmente. Busca semper un oportunidad pa crece y sali for di bo zona di confort pa logra bo metanan.”
Na final di su discurso, e mandatario mes a sali for di su zona di confort, y a canta un parti di e cantica Miss Dior di Jeon cu letra adapta na e ocasion. “Mami sweet su barbie bon lanta. Mi coloña ta parce Miss Dior, Mi sa ki e conan ta. Nan ta yama mi Xiomara, Mi so, mi’n falta nada. Nada. Mi mes ta nabega.” Un gesto cu a wordo masha bon ricibi pa e publico.
Grandi e sorpresa tabata ora cu Jeon mes a subi stage pa asina dedica e cantica Miss Dior como un serenata pa tur e damanan presente riba nan dia special. Esaki tabata un sorpresa cu Minister Maduro a plania den tur secrecia pa yama danki na tur e damanan cu a bin hunto den e conferencia dedica na e Hende Muhe di Aruba.
Minister Maduro kier yama un danki special na nos artista internacional Jeon pa e bunita gesto aki cu a keda graba den mente y curason di tur e damanan. Masha danki Jeon pa haci e apertura di e conferencia uno asina special.
