Foro organiza pa Aruba Food and Beverage Association tabata exitoso

Aruba Food and Beverage Asociation -AFBA- a organiza un foro un par di siman pasa den e Ballroom di La Cabana Beach Resort pa miembro y invitadonan. E foro su obhetivo tabata intercambia, conversa, informa, colabora y delibera riba procesonan pa consecucion di personal califica o cu tin interes pa traha den industria di Horeca.

 E foro mes a consisti den su prome parti den presentacionnan di SVB, Dimas, y DPL. Y na segundo luga a dirigi un panel cu e mes un integrantenan acompaña tambe pa Minister di Labor, Energia y Integridad sr Glenbert Croes.

E mas di 70 asistente, entre otro representante di Restaurants, Bar, ATIA, CUA, Camara di Comercio, AHATA entre otro a hanja oportunidad di hanja informacion relevante di e tres  departamento di Gobierno relaciona cu temanan di Labor. Nan por a hanja respuesta riba nan preguntanan no solamente riba personal sino tambe riba actualizacion y digitalizacion di procesonan actual y cu lo bin ainda e anja aki.

E metodologia implementa pa por a sigui un reunion ameno y jena di informacion a hasi cu a logra cubri e mayor cantidad di pregunta, y esnan restante lo ser respondi y manda na tur asistente den transcurso di siman.

E discurso di sra Miriam Dabian COO di AFBA a enfatiza cu lo keda vigilante na tur desarrollo di cambio y adaptacion den e procesonan pa logra personal pa labora den e industria di Alimento y Bebida. Manera a sigui menciona, turismo na Aruba ta sigui crece, presentando oportunidadnan pa nos industria. AFBA ta comprometi pa explora solucion nan  innovativo pa mehora nos ofertanan di servicio. Mientras digitalizacion, modernizacion, y robotika ta hunga un papel fundamental den e esfuersonan aki, AFBA tambe ta enfoca riba inspira y motiva hobennan pa considera un carera den sector di Horeca.

E industria di Alimento y Bebida na Aruba ta contribui significativamente na e GDP di e pais. E sector aki, incluyendo restaurant, bar, cafeteria, y servicionan relaciona, ta considera un di e sectornan principal cu ta stimula actividad economico y entrada di turismo na Aruba. E ta brinda oportunidadnan di empleo, genera entrada for di bishitantenan tanto local como internacional, y ta contribui na crecemento y desaroyo economico general pa Aruba. Apesar di nos contribucion significante na economia, e miembronan di AFBA ta enfrentando desafionan cu no ta ser atendi agilmente door di instancianan concerni.

“Mi tin confianza cu e foro aki lo brinda un plataforma pa dialogo y colaboracion di balor, liderando na desaroyo di mecanismo y proceduranan cu ta mas eficiente pa atende e necesidadnan di nos industria y di Aruba en general. Nos meta ta pa entrega servicio excepcional y un variedad diverso di gastronomía internacionalmente renombra” sra Dabian ta expresa.

Na final di e Foro a ser aproba pa bin cu un reunion di seguimiento riba tur tema prometi na final di anja pa por revisa progreso. Tambe lo organiza un comite cu muy pronto lo ser estableci cu diferente instancia di industria pa asina continua e labor di revisa, actualiza y informa e comunidad di lo kue tur ta ser hasi pa asina agiliza procesonan pa por logra kubri puestonan di trabou.

Sra Miriam Dabian COO di AFBA ta opina ademas cu e Foro tabata exitoso y cu e boluntad ku a ser expresa pa traha den forma conhunto lo logra e cambio y adaptacion rekueri pa e industria Di Horeca duna e calidad di servicio exigi door di nos local y bishitantenan.