PATRUYA POLICIAL FORD EVEREST Y RANGER TA CLA PA SUBI CAMINDA cu zwaailicht blauw y cora:

MACUARIMA, ARUBA:  E imagen nobo pa e siguiente etapa di Cuerpo Policial Aruba ta cla pa subi caminda. Den un celebracion ameno na e compania di auto Yrausquin a haci entrega oficial di e flota nobo pa patruya policial, departamento di trafico y polis na frontera.

Den presencia di minister di Husticia y Asuntonan Social Sr.Rocco Tjon, altocomisario di Polis drs. Ramon Arnhem, mando policial y gerencia di Yrausquin a haci e acto simbolico di en total di 34 auto policial nobo.

Di marca Isuzu algun aña atras awor KPA su patruya policial ta cla pa sigui patruya den Ford model Everest y Ranger. Un cambio grandi na e vehiculo policial pa locual ta trata e marca y modelo pero tambe tecnologia avansa usando e ultimo modelo nobo di marca “Whelen”. A haci un cambio radical for di e zwaailicht blauw y oraño pa blauw y cora. E cambio aki tabata ta pa  miho visibilidad y seguridad pa e agentenan policial pero tambe pa comunidad. Tambe lo tin sonido di sirena diferente compara cu antes pa mihor sonido.

Como fuera e flota nobo aki tambe lo ricibi “Data Terminals” pa asina e agentenan por ta mihor equipa den nan patruya policial cu informacion. Di e forma aki Aruba ta dal un stap grandi locual ta tecnologia y husticia.

“Inverti den nos hendenan, tecnologia y material y crea un sentido di seguridad pa nos comunidad y nos agentennan. Cuerpo Policial Aruba ta den desaroyo positivo pa asina crea un base solido pa e futuro di KPA”. Tabata palabranan di altocomisario Arnhem hopi satisfecho cu otro logro mas pa bienestar di KPA y e seguridad di Pais Aruba.

E patruya policialnan aki lo subi riba nos carteranan cu e colornan di nos bandera blauw cu su strepinan geel cu orguyosamente nos ta carga nos bandera Aruba dushi tera.