MINISTER ENDY CROES TA DIVULGA RIBA ALGUN DESAROYO DI E PROYECTO DI RENOBACION DI PALO MARGA

ORANJESTAD: Recientemente, Minister di Enseñansa di Deporte Endy Croes a divulga riba algun desaroyo di e proyecto deportivo di Palo Marga International Raceway Park. Manera ta conoci, pa mas di 10 aña Palo Marga no a haya atencion di e gobiernonan anterior y no tabata den un condicion adecua. Despues di evalua e necesidadnan cu tabatin den Palo Marga, desde aña 2023 a inicia cu e prome fase di e proyecto di renobacion di Palo Marga. Pa e prome fase di renobacion a aloca 26 poste di luz, instala cabel di coriente y a construi un baki di santo na e final di pista, cual ta pa evita cualkier desgracia den caso cu break di auto faya. A inverti den luz ultramoderno LED light di marca Philips. Den e luna di juli di aña pasa a concretisa e prome fase aki, unda a cende e luznan di Palo Marga cu ta ilumina e pista desde inicio te na final di e pista. Esaki sigur ta brinda e coredonan siguridad, mirando cu nan tin un miho bista di e pista. E mandatario di Deporte a haci un promesa di sigui cu e di dos fase di renobacion di Palo Marga, cual ta pa renoba e pista completo di Palo Marga pa cumpli cu e standardnan internacional.  Pa esaki, a trece Sr. Kurt Johnson di Total Venue Concepts, un profesional den e preparacion di pista di “drag racing” na Merca. Sr. Johnson a bishita Aruba na final di aña 2022, pa evalua kico tur mester haci pa e pista di Palo Marga wordo certifica. Sr. Johnson den su carera a atende cu varios pista di drag race rond mundo y tin conocemento y experticio amplio pa evalua, midi, bora, analisa pista y duna un rapport final. Aña pasa Sr. Johnson a traha un rapport di e pista di Palo Marga y a presenta tres (3) opcion den su rapport. Durante un reunion, Minister Endy Croes hunto cu Arubaanse Wegenbouw Maatschappij (AWM) y Dienst Openbare Werken (DOW) a discuti riba e topico aki pa mira cua di e opcionnan aki ta factibel. Na final di e reunion, a conclui cu actualmente no tin tur e ekiponan necesario na Aruba pa cumpli cu e standardnan internacional. Sinembargo, a traves di e contactonan di Sr. Kurt Johnson a ricibi un oferta adicional pa complimenta e proyecto aki. Durante e prome siman di april, Sr. Johnson y su team lo yega Aruba cu ekiponan di Merca pa guia AWM y DOW. Ademas di esaki, AWM lo trece un experto di Hulanda pa concretisa riba nivel di millimeter con nan lo basha e pista. Sr. Johnson a propone pa uza un mix special pa e pista, esta “race quality asphalt”. E materialnan a yega Aruba caba pa inicia cu e trabou na comienso di april. Ta planifica pa termina e proyecto di renobacion di e pista di Palo Marga na final di mei. Pues, tin hopi energia y trabou hinca den Palo Marga desde aña 2023. Desde Bureau di Minister di Deporte Endy Croes a keda monitorea, trek y guia e proyecto aki. A percura continuamente pa e fondonan yega pa realisa e proyecto di Palo Marga, pa cumpli cu e condicionnan internacional y tin un pista certifica pa e proximo 15 añanan. Cu esaki Gobierno di Aruba ta percura pa brinda esnan cu ta practica e deporte di drag race siguridad. Minister Endy Croes ta gradici DOW, AWM, directiva di Palo Marga, Ministerio di Deporte, tur stakeholder y team di profesional di Merca cu a bin cu un plan strategico pa hunto cristalisa e proyecto aki. Finalmente, e mandatario di Deporte ta desea tur coredo hopi exito cu e logro aki. “Ta nos compromiso pa contribui den e desaroyo di deporte di Aruba y Gobierno di Aruba ta invertiendo den deporte pa bienestar di tur deportista”, Minister Endy Croes a conclui.