Parlamentario di AVP, Arthur Dowers: Rocco Tjon no kier carga su responsabilidad pa derecho humano di detenido y preso

Sea cu e persona ta deteni na warda of cera na KIA, ta responsabilidad di minister di husticia cu ta respeta e derecho humano di e invididuonan aki. Asina parlamentario di Partido di Pueblo Arubano, AVP a splica e siman aki reaccionando riba Minister Tjon su resistencia na admiti cu el a faya den e maneho di cuido di preso.

Prizon ta un di e retonan grandi di Pais Aruba y no ta algo nobo, asina e ex minister di husticia den Gabinete Mike Eman I y II a indica. Un di e obstaculonan di mas grandi tabata hustamente e influencia di politica. El a corda con hasta cierto lider sindical a uza KIA como un instrument politico pa strob’e di por a bin cu solucion.

Asina mes, a logra laga e areglo di posicion huridico di e personal cla, sinembargo nunca mas esaki a mira luz di dia. Tabata bisto cu tabata trata djis di un strategia politico. “Loke si ta tragico,” segun Dowers, “ta cu despues cu Rocco Tjon a uza esunnan di e departamento pa su proposito, e tampoco a percura pa nan haya loke nan tin derecho riba dje.”

Algo cu a keda resona masha hopi cerca e parlamentario di AVP ta con e minister recientemente den parlamento Minister Tjon a admiti cu e no por soluciona e problemanan aki cu ta data di tanto aña atras. Ta manera cu el a scoge di sigui cu e draaiboek di su antecesor y actual consehero Andin Bikker.

Dowers: “Señor Tjon tin cu realisa su mes cu bo no tin mester di un aña pa bo drecha of haci un cel limpi, of pa percura pa tin trahado pa e detenido por lucht of haya un bishita. Señor Tjon ta responsabel y e tabata sa cu parlamento ta pasando un ley cu e mester a prepara p’e.”

E incompetencia di Tjon ta bin di tempo cu e tabata na cabes di e departamento y Dowers como minister mester a interveni na mas di un ocasion pa sigura cu e detenido ta haya un trato humano. Mientras tanto pa friends & family si tin placa caminda fondo cu por a bay pa centronan di detencion, ta bay mas bien pa famia di Evelyn Wevr-Croes cu ta traha den Futura y pa campaña publicitario tocante trafico.