Secretario General di MEP na Mike Eman y AVP: Prohibi pa lubida

MIKE EMAN A DUNA SU RUMAN VEN EMAN 1.9 MIYON PA 1 AUTO DI DRAG RACE

Nos por a tuma nota cu algun “sapato bieu” di AVP manera, Mike Eman, Mike de Meza  y Dowers ainda kier fomenta odio den pueblo contra nos Minister Presidente Evelyn Wever-Croes y partido MEP. Nos lo percura pa keda recorda pueblo di e berdadero cara di AVP. Alabes lo percura pa nunca pero nunca mas pueblo lubida e gran logronan di AVP den e periodo 2009-2017: 1. AVP a crea e Mega Debe; 2. AVP a bin cu e LAFT; 3. AVP a ranca 201 miyon di nos companianan estatal; 3. AVP a Hedge WEB, cual a costa pueblo 300 miyon; 4. AVP a regala Richard Arends “Horizon Consultancy” 4 miyon florin; 5. AVP a regala Speed y Patrick 8 miyon florin; 6. AVP a corumpi RDA hortando 20 miyon; 7. AVP a regala Patricia Dowers, kende ta casa di Dowers, 400 mil florin; 8. AVP a regala abogado Sjiemfat 5 miyon florin; 9. Mike Eman a regala su ruman 1.9 miyon pa 1 auto di careda; 10.  AVP a brasa corupcion cu e resultado conoci casonan IBIS y Avestruz, unda Paul Croes awe ta cera den KIA y Benny Sevinger tin veredicto di prison riba su cabes rumbo pa KIA. Pues, a “Mafia Partij” AVP y su bandidonan ta bon conoci pa su casonan bochornoso y esaki hamas pueblo kier pa ripiti. Tur ta cu prueba!

Auto di drag race di ruman di Mike Eman:

Awe nos lo recorda Mike Eman y AVP con Mike y AVP a practica nepotismo. Net Mike Eman a manda un carta Hulanda riba e tema nepotismo! Het kan verkeren. Mike Eman ( AVP) a percura pa durante ocho (8) aña un (1) solo auto di careda ( drag race) ricibi 1.9 MIYON florin di fondonan di pueblo pa core na Merca. Por escrito a haci uzo di derechonan di parlamentario algun aña pasa pa por a haci pregunta na ATA y AAA. Por escrito a ricibi contesta for di ATA y AAA cu ruman homber di Mike Eman a ricibi 1.6 MIYON florin for di ATA y 300 mil florin for di AAA pa un total di 1.9 MIYON florin. Esaki a pasa bou di e nomber Team Aruba, unda Mike Eman su ruman homber y Mike Eman su sobrino tabata “Team Aruba” y esnan cu a ricibi y disfruta di e fondonan di pueblo aki. Prohibi pa lubida! Mama Aruba y Deporte di drag den totalidad sufriendo mientras un yiu ta “luhia”.

Palo Marga casi a bira un ruina:

Mientras e pista di Palo Marga na Aruba tabata den decadencia total, Mike Eman tabata percura pa su ruman y su sobrino por “luhia” cu fondonan di pueblo na Merca. Tristo pa mira con e unico pista di drag race na Aruba tabata cayendo den otro. No tabata tin luz na e parke aki, pista mes den condicion fatal y caredanan no por a wordo organisa manera mester ta. Deporte di drag race tin un fanaticada masha grandi y alrededor di 700 persona ta practica e deporte aki. Deporte aki ta wordo sosteni pa familiar y amigonan na un forma masal, pero ni esaki no tabata importa Mike Eman y AVP. Pa Mike Eman y AVP tabata mas importante pa su ruman y su sobrino por core na Merca “atracando” 1.9 miyon di e fondonan di pueblo pa logra nan meta. Menos importante tabata ta e sufrimento di tur nos otro coredornan y esnan cu ta stima drag race.

Ayudo ta na caminda pa Palo Marga:

Kier enfatisa cu e ayudo ta na caminda pa Palo Marga. Den aña 2023 a instala 26 poste di luz pa ilumina henter e pista y den aña 2024 lo recap e pista completo cu un race asphalt mix ultramoderno pa pone e pista bek den e condicion cu e lo bira uno di esnan miho den region. Inversion total di alrededor 1.9 miyon florin. Cu pasenshi ta gana gloria. Un compromiso cu si mester ta cla cu AVP nunca, pero nunca mas por goberna e pais aki bek.