Parlamentario Alvin Molina (MEP): Comision di Husticia di parlamento ta trahando riba e ley di ‘roekeloos rijden’.

Siguridad den trafico ta nos.

Siguridad den trafico ta depende di 3 factor: ley, infrastructura y comportacion. Parlamento di Aruba ta aproba e ley, unda cu ta describi e reglanan con mester comporta den trafico y kico no ta aceptabel. Na e momento aki, Fraccion di MEP ta trahando riba e ley di ‘roekeloos rijden’. Loke ta regarda infrastructura por ehempel: borchi, asfalt y ‘sleeping police’ ta cay bou maneho di DOW. E meta ta pa crea circunstancia mas ideal y sigur posibel pa esnan cu ta haci uzo di nos careteranan.

Hasta si e ley y infrastructura ta 100% na ordo, un trafico sigur ta depende di nos tur, si nos scoge pa cumpli cu e reglanan stipula. E controlnan cu polis ta haci pa ‘gara’ esnan cu no ta cumpli cu regla, por tin un efecto preventivo si haci nan frequentemente. Tambe, por mira e manehadonan di vehiculo cu kisas tin e boluntad pa contribui na siguridad den trafico, pero falta di informacion pa por hacie na e manera corecto. Si nos mira por ehempel na e rotondenan rond di nos isla y riba e camindanan cu ‘double lane’: Sasaki, Green Corridor y Watty Vos Blvd cu  ta diseña pa promove fluho y siguridad di trafico, pero por resulta lo contrario ora no ser uza na e manera indica. E uzo y/of con pa uza signlight y na ki banda di caminda mester core ta puntonan cu nos hendenan merece di wordo educa riba dje. Duna boet pa esaki den mi opinion no ta na su luga, tanten cu no a haci suficiente esfuerso pa  educa comunidad. Pesey, den luna di maart 2022, mi a entrega un mocion, unda mi a urgi gobierno pa organisa un campaña di conscientisacion tocante siguridad den trafico y specificamente riba e 2 puntonan menciona. E mocion a keda aproba unanimamente door di parlamento y bon ricibi door di nos Minister di Husticia cu a lansa e campaña nacional ‘Trafico Sigur’. Danki na Minister Rocco Tjon pa tuma accion. Mi peticion na Pueblo di Aruba ta pa pone bon atencion ora ta stuur, respeta regla y respeta otro pa hunto nos eleva e siguridad den trafico.