Conseho di Cultura: anda cu archivonan colonial ta rekeri colaboracion ekivalente

Cu e conseho ‘Anda cu fuentenan comparti di e pasado colonial’ Conseho di Cultura ta duna recomendacionnan relaciona cu con ta anda cu archivonan colonial y coleccionnan documental. A entrega secretario di estado Gräper-van Koolwijk e conseho riba 25 di maart.

Den e conseho, e Conseho di Cultura ta sali for di tres punto di bista con ta anda cu archivonan colonial y coleccionnan documental: e reconocemento di e inhusticia cu e estado a comete cu e ex colonianan; e boluntad pa drecha e inhusticia aki caminda cu esey ta posibel; y e necesidad pa preveni inhusticia nobo y e continuacion y/of efectonan di inhusticia historico.

Haci e archivonan publico y accesibel den colaboracion cu interesadonan por yuda preveni inhusticia nobo. E archivonan ta contene fuentenan importante pa studia propio historia, y pa por investiga propio historia di manera profundo no mester ta reserva solamente pa algun.

Den e recomendacionnan ta enfatisa pa reconose e propiedad cultural y/of moral comparti di e archivonan colonial y coleccionnan documental. Entre otro, ta recomenda pa Hulanda hunto cu e paisnan enbolbí bai den un dialogo ekivalente pa asina e archivonan y coleccionnan documental por ta accesibel, usabel, interpretabel y visibel pa tur interesado mundialmente.

Ademas, e Conseho ta duna recomendacion con pa trata cu peticion di restitucion. Por institui un comicion independiente cu ta consisti di expertonan nacional y internacional pa duna conseho riba cada peticion. E Conseho no ta exclui restitucion. E ta yega na e conclucion cu den casonan di peticionnan di restitucion di archivonan colonial y coleccionnan documental, trabou na midi ta apropia.

E Conseho ta di opinion cu e asunto di recuperacion di inhusticia relaciona cu archivonan colonial no ta tanto un asunto huridico como un asunto etico. Pa e motibo aki e Conseho a brasa e consepto di husticia transitorio pa yega na recomendacionnan cu lo por wordu realisa.

Esaki ta nifica cu comunidad por recupera di violacionnan masivo di derechonan humano dor di haci esfuersonan pa haña e berdat, dor di haci husticia y duna derechonan na (famianan di) e victimanan y dor di haci tur locual ta posibel pa evita un ripiticion di e inhusticia.

Un comicion cu ta consisti di Dagmar Oudshoorn (presidente), Leo Balai, Deirdre Carasso, Michael Karabinos, Wim Manuhutu y Matthias van Rossum, a prepara e conseho cu Conseho di Cultura a duna.