Parlamentario Marco Berlis (MEP) ta reacciona riba Ley di Ombudsman part 1:
Oposicion encontra di un ombudsman na Aruba
Capricho politico y partidario riba interes di pueblo

Diahuebs mainta, Maart 10 tabata un dia scur pa Parlamento y pueblo di Aruba en general, ora cu Parlamento no por a yega na e votonan necesario pa por a ancra e Ley di Ombudsman den nos Constitucion. Oposicion den su totalidad a mustra un biaha mas cu e no tin Aruba na pecho, y solamente por a pinta un cuadro scur y negativo den tur cos. Cu hopi gritamento y insinuacion politico e miembronan di oposicion a purba hustifica nan escogencia. Pa 8 aña AVP a sinta y nunca a haci nada pa logra esaki. Y ta importante pa realisa cu tin un coalicion den oposicion, cual por a ser pre-mira for di tempo di campaña pa eleccion. MAS y Accion 21 nunca a cuestiona, puntra, expone, ni señala e corupcion den AVP den ningun debate, rueda di prensa of articulo. E corupcion aki tambe a wordo expresa un biaha mas den forma di boycotea e Ley di e Defensor di Pueblo.

Kico ta un ombudsman?
E Ombudsman ta e Defensor di pueblo. E ta un institucion cu lo defende pueblo y nos muchanan. Ora cu un ciudadano no ta di acuerdo cu algo of a wordo perhudica e por bay cerca e Ombudsman cual lo cuminsa un investigacion independiente pa analisa e caso. Su reikwijdte ta cubri Gobierno y instancianan semi-gubernamental y otronan. E Ombudsman mester defende e interes di tur ciudadanonan.

Bijzondere commissie Ombudsman
For di 2013 te cu 2020 a reuni 19 biaha cu tur parlamentarionan den e bijzondere commissie di Ombudsman. Den e reunionan aki a papia entre tur parlamentario con pa hinca e Ley di Ombudsman den otro. Tambe tabata tin oportunidad pa haci cambionan y traha amiendanan. Sinembargo, na 2020, e producto final di e Ley aki tabata na agrado di tur hende y asina a yega na e siguiente paso cual ta yama un reunion publico.

Reunion publico Ombudsman
Na September 24 2020, tabata tin e reunion publico den cual Parlamento den su totalidad a vota unanimamente pa aproba e Ley di Ombudsman. E hecho ta si a aproba e Ley di Ombudsman unanimamente ta pasobra henter Parlamento a bay di acuerdo cu e Ley ta bon y no falta nada y cada miembro tabata parti di e esfuerso su tras. Den henter Reino Hulandes, nos ta te ainda e unico pais cu no tin e Ley di Ombudsman ancra den nos Constitucion. Tur caminda unda e Ley aki a wordo hancra den e constitucion di e pais den Reino, e la funciona bon.

Con bo ta bira ombudsman segun e ley actual?
Prome un persona por bira un ombudsman, e mester pasa den un proceso. Voorzitter di Raad van Advies, Hof van Justitie y tambe algemene Rekenkamer mester produci 3 nomber cu ta match e profile exigi den Ley pa un Ombudsman, pasobra e mester ta un persona apolitico. Despues di esaki, un ta wordo escogi y esaki mester pasa den Parlamento y por wordo solamente aproba y apunta cu 2/3 di e votonan di Parlamento. Kiermen e mecanismo pa yega na un Ombudsman ta solido.
Amienda nr. 6: E capricho sin base di oposicion
Sinemabargo nos por a cuminsa wak caba for di Diaranson unda cu sr.Mansur a cuminsa vocifera cu si amienda number 6 no pasa, unda ta exigi cu 2/3 parti di Parlamento mester aproba retiro di e Ombudsman, e no lo vota na fabor di e Ley. Ta remarcabel unda cu henter oposicion tabata den un acuerdo y trahando hunto riba esaki, mientas cu e resto di Reino no tin esaki den e Ley. Oposicion tabata tilda cu politicamente mester a salba e Ombudsman di metemento politico. Mester subraya cu den articulo 6 di e Ley di Ombudsman tin solamente dos motibo pa locual un Ombudsman por wordo kita for di trabao y cu esaki no ta bai facil. Pakico no facil? Pasobra prome; lo ta un suicidio politico pa kita un Ombudsman cu ta haci su trabao corectamente. Ta pa motibonan hopi serio so lo por kite y mester aprobacion di e mayoria, den e caso aki 11 parlamentario. Esaki ta identico den henter Reino Hulandes na unda e Ley di Ombudsman ta funciona perfectamente. Oposicion semper lo keda vota encontra e interes general di e Arubianonan, pasobra interes di nan partido ta prome!