Secretario General di MEP na DOWERS y AVP: PATRICIA DOWERS A COBRA 400 MIL FLORIN DI CASA PA CASA

Prohibi pa lubida

Nos por a tuma nota cu algun “sapato bieu” di AVP manera, Mike Eman, Mike de Meza y Dowers ainda kier fomenta odio den pueblo contra nos Minister Presidente Evelyn Wever – Croes y partido MEP. Nos lo percura pa keda recorda pueblo di e berdadero cara di AVP. Alabes lo percura pa nunca, pero nunca mas pueblo lubida e gran logronan di AVP den e periodo 2009-2017: 1. AVP a crea e Mega Debe, 2. AVP a bin cu e LAFT, 3. AVP a ranca 201 miyon di nos companianan estatal, 3. AVP a Hedge WEB, cual a costa pueblo 300 miyon, 4. AVP a regala Richard Arends “Horizon Consultancy” 4 miyon florin, 5. AVP a regala Speed y Patrick  8 miyon florin, 6. AVP a corumpi RDA hortando 20 miyon, 7. AVP a regala Patricia Dowers, kende ta casa di Dowers, 400 mil florin, 8. AVP a regala abogado Sjiemfat 5 miyon florin, Rapport Bo Aruba di Algemene Rekenkamer cu a prueba e corupcion di 1.6 biyon florin di AVP, 9. Mike Eman a regala su ruman 1.9 miyon pa un (1) auto di careda,  10. AVP a brasa corupcion cu e resultado conoci casonan IBIS y Avestruz, unda Paul Croes awe ta cera den KIA  y Benny Sevinger tin veredicto di prizon riba su cabes rumbo pa KIA. Pues, e “Mafia Partij” AVP y su bandidonan ta bon conoci pa su casonan bochornoso y esaki hamas pueblo kier pa ripiti. Tur ta cu prueba! Prohibi pa lubida.

Dowers papiando di integridad anto su casa a cobra 400 mil florin:

Nos por tuma nota cu Dowers kier papia di integridad. Dowers kier insulta nos Minister Presidente Evelyn Wever – Croes y kier ataca partido MEP den su totalidad na un forma baho. Con Dowers tin e pudor di papia di integridad. Den AVP ta nepotismo y corupcion a wordo practica entre 2009-2017. Dowers no tin berguensa?  Dowers su casa Patricia a ranca 400 mil florin for di fondonan publico.  Dowers mes kier public’e of Dowers kier pa nos public’e ? Esaki ta nepotismo.

Dowers ta cera wowo pa realidad:

Arthur Dowers ta un di e politiconan mas corumpi na Aruba. Banda di a practica nepotismo, Dowers a brasa corupcion. Dowers ta bon bon na altura di e casonan manera, IBIS di Paul Croes cu awe ta pagando pa esaki den KIA y sigur Dowers ta completamente na altura di e caso AVESTRUZ di Benny Sevinger, esta e corupcion di siglo. Benny y e gang di AVP entre otro, Leoncita “bisami” Arends, Susebeek pa nombra algun ta amigonan directo di Dowers y tur a haya sentencia di prizon. Refrescando Dowers su memoria hues a incuata, esta kita 2.5 miyon florin for di Susebeek, kende ta e miho amigo di Benny y Dowers for di Orca Bank na Curaçao, placa procedente di benta di terenonan di pueblo. Dowers nunca, pero nunca ta papia di corupcionnan monstruoso di e “Mafia Partij AVP”. Alcontrario, Dowers kier ataca Minister Presidente di Aruba riba tema di integridad, mientras Dowers y AVP ta brasa corupcion y ta protegiendo Benny Sevinger te cu awe, mientras Benny ta un criminal sentencia den corte. Tur esakinan ta prohibi pa lubida y nos lo percura pa ki ora Dowers papia disparate nos lo refresca su memoria pa pueblo conoce e berdadero cara di e mafiosonan di AVP.