Afpakteam activo na aeropuerto priva

Siman pasa tabatin varios control na aeropuerto priva. E controlnan integral aki tabata den man di Afpakteam, Interpol y UMM (Unit Mensensmokkel en Mensenhandel) y a tuma lugar den cooperacion estrecho cu AAA (Aruba Airport Authority).

Angeline Flemming, director di Health, Safety and Sustainability di AAA, a bisa: “E accionnan aki ta subraya e obhetivo di AAA pa promove operacionnan safe na aeropuerto. E cooperacion cu organismonan local y internacional encarga di mantene ley tabata excelente y e esfuerzonan conhunto tabatin un impacto grandi. E frecuencia lo aumenta den e lunanan venidero”.

Afpakteam ta un asociacion entre varios partner di investigacion, entre otro Ministerio Publico, Polis, Aduanas, Unidad di Inteligencia Financiero (UIF), Marechaussee (KMar) y Guardia Costa.

Afpakteam a lanta na 2017 cu e obhetivo di combati delincuencia financiero subversivo na un manera mas eficiente, particularmente via prevencion y deteccion di actividadnan di labamento di placa y di kitamento di activonan obteni via crimen. E bienes cu a wordo kita ta bay den un fondo special di Aruba, cu ta sirbi pa lucha contra crimen.

Tur e partnernan a indica cu lo hiba mas control integral den futuro.

Pa tips y señalnan (di labamento di placa) por comunica cu Afpakteam via tiplijn (11141).