Parlamentario di AVP, Mervin Wyatt-Ras: Gabinete Wever-Croes II ta sacrificando pueblo pa yena nan saco

Manera a keda informa pa prensa, tin un situacion di crisis den hospital caminda empleado mester lucha pa nan derecho. Esey a pone parlamentario Mervin Wyatt-Ras activa, kende a bisa di semper ta solidario cu empleado y e beneficio cu mester tin tambe pa salubridad publico. P’esey diamars mainta a compaña lider di partido AVP, Mike Eman den un conferencia di prensa pafo di hospital.

E parlamentario di oposicion a ripiti e ponencia cu a trece varios siman atras, esta e aumento di 23% den e promedio di indice di mortalidad riba nos isla y cu e ta califica como un indicador alarmante. Y mientras cu parlamentario di coalicion, Setty Christiaans-Yarzagaray ta bagatelisa e echo argumentando cu ta trata djis di e embehecemento di poblacion y di e indice di malesa cronico, Wyatt Ras ta kere cu e pueblo di Aruba merece miho.

Echo ta cu hopi di e situacion aki tin di haber cu e medidanan cu Gabinete Wever-Croes I y II a impone riba nos comunidad. “Hopi ta mishi cu nan salud directamente. Hopi ciudadano no por haya nan medicina na botica pasobra no por paga. Esey ta afectando nos salud awe y mas den futuro,” Wyatt-Ras a comenta.

Adicionalmente, e aumento di BBO e introduccion di BBO na frontera a haci di e cumindanan mas saludabel fuera di e alcance di mayoria ciudadano. E consumo di cumindanan mas barata, pero yena cu color y preservativo, ta aporta na e aumento di malesanan cronico. E mesun tin consecuencia riba desaroyo fisico y mental di e hobennan, cu tur su consecuencia socio-economico. Wyatt-Ras: “E gobierno aki no ta mira cu djis pa yena nan saco, ta sacrificando nos pueblo.”

Entre e preguntanan cu fraccion di AVP a dirigi na Parlamento di Aruba pa Minister President contesta, ta pidi pa bisa kico ta haciendo den termino di prevencion pa evita cu e indice di mortalidad por sigui subi. AVP kier sa kico e minister di salud ta haciendo pa mehora e acceso oportuno na cuido medico y con ta eliminando e retraso ocasiona pa e pandemia.

Otro punto di preocupacion di AVP cu Wyatt-Ras a menciona ta e dificultad cu tin keto bay pa entidad medico traha cu otro, loke por mehora substancialmente e cuido integral y mayor prevencion cu ta traduci den menos gasto medico.

Wyatt-Ras: “Kico gobierno ta bay haci pa preveni cu nos hendenan ta muri na gran escala. Colega ta bisa cu mi ta dramatisa, pero e ta un cifra tangible y nos mester haci algo cu ne. Nos a haci 11 pregunta, te ainda di dia 14 di maart no a haya contesta, pero esey ta e modus operandi.”

Nos como pais mester para fuerte. Tin un crisis den mundo medico y e ta afecta salud di nos hende y tambe muchanan. E parlamentario di AVP a conclui ratificando su compromiso di duna atencion y siguimento na e topico. “Nos mester traha riba nos salud y preveni. No ta keda para contra salud di clase y inhusticia den cuido medico.”