Minister Maduro tabata presente na Plaza Status Aparte riba Dia di Himno y Bandera

Danki na Betico Croes cu awe nos por canta nos propio himno y hisa nos mesun bandera

Riba Dia di Himno y Bandera, Minister Maduro di Cultura tabata presente na Plaza Status Aparte na Santa Cruz pa asina hiba palabra na e ocasion festivo. E mandatario a recorda tur presente cu ta danki na e esfuersonan di Betico Croes, awe nos tur por canta nos himno ‘Aruba, Dushi Tera’ cu orguyo y por hisa nos bandera cu tur honor, pa e por bula den tur libertad.

Minister Maduro hunto cu e Presidente di Fundacion Betico Croes, a haci un ofrenda floral pa recorda y gradici Betico pa tur su esfuersonan pa awe nos por ta un Arubiano orguyoso di su Pais.

E mandatario a haci uzo di e oportunidad tambe pa gradici e directiva nobo di Fundacion Betico Croes y desea nan forza cu e trabou importante pa conserva e historia di e trabounan, esfuersonan y logronan di Betico Croes na bienestar di Aruba.