Booshi Wever: SCONDE E BERDAD TA E FORMA DI PROCEDER DI TANTO PARTIDONAN DEN GOBIERNO COMO DEN OPOSICION!

Un “bon” gobernacion ta traha segun un vision di loke kier logra den futuro y tambe lo percura pa sigui cu e maneho realistico y aproba pa Parlamento di e gobierno anterior. Mescos cu e gobierno anterior a keda demonstra cu e gobierno actual no tin un vision y tambe ta ehecuta un maneho basa riba mentira y incumplimiento.

 Pa mas di 14 aña Aruba a wordo goberna sin pia ni cabes, cu ta e motibo principal tambe pa pobresa a sigui aumenta riba nos Isla y cu nos a perde mas autonomia. Gobierno kier laga nos kere sinembargo cu e caminda nos dilanti lo bay ta briyanteT, ya cu institutonan manera S&P, Fitch y hasta CAft ta elogia e recuperacion financiero. Pero dicon anto gobierno a laga sa di lo ehecuta un maneho unda lo “cremencha”, anto den e presupuesto pa yuda esnan mas vulnerabel den nos sociedad?

Si Banco Central tin razon, mas di 50% di nos pueblo ta biba den un situacion financiero precario.  Pues e cantidad di esnan vulnerabel lo ta hopi. Y e “garnachi” cu gobierno kier ofrece na esnan vulnerabel, no tin nada di haber cu e gobierno diripente a haya un iluminacion celestial te pa tin tin misericordia di nos pueblo. E “garnachi” ta unicamente debí na e hecho cu e gobierno ta den su ultimo rosea y ya a cuminsa prepara pa e campaña electoral. No ta gobierno so ta den preparacion pa e siguiente contienda electoral. E partido nobo di e corupto Otmar Oduber tambe a cuminsa cu su campaña unda e ta sigui fomenta mentira. Ta obvio cu e maneho di e minister encarga cu medio-ambiente ta desastroso, pero ta e mesun Otmar ta autor intelectual di e masacre cu a tuma lugar den maneho di desperdicio. A nombra un director cu antecedentenan cuestionabel. A huur un edificio na Pos Chikito di un di su sponsor mayor di campaña. A cera un contract miyonario pa deshasi di e desperdicio na Cer’i Teishi sin cu ta cumpli cu condicionnan pa haci tal. A usa fondo pa atende cu e situacion di RWZI, contra conseho di e director di DOW y por ultimo a laga cumpra un incenirator por medio di “gesjoemel” cu te ainda no ta traha.

E comportacion actual di  Otmar no ta nada straño. Loke si ta remarcabel ta e silencio di parti di gobierno y di oposicion. Pakico Otmar ta critica solamente un partner di e coalicion? Por ta pasobra e mescos cu henter pueblo ta indentifica Raiz como un partido “chiripero” of pasobra no ta cumbini Otmar pa bay den debate cu e Prome Minister? Por algo sera! 

Di otro banda oposicion ta kedando keto apesar di ta na altura di tur e actonan coruptivo cometi pa  Otmar. Aki tambe lo por pensa cu Otmar lo tin informacion delicado di e gobierno di AVP cu e tabata forma parti di dje, pero mas bien mester pensa cu tur critica riba e gobierno ta welkom pa e partidonan den oposicion cu ta carga e speransa di por waak e gobierno tuma su retiro?

Falta di vision tambe por constata ora den prensa ta ser menciona cu tin un escases grandi di dokter di cas pa locual e lista di espera y tambe e calidad di cuido den “eerste lijn” ta core peliger. E ta pa ami incomprendibel pero vooral inacceptabel cu awor tin un escaces di dokter di cas. Durante mi encargo como Minister di Salubridad, mi a percura pa inicia un opleiding pa dokter di cas. Esaki no a sosode sin mas. Ya caba tabata premira cu e cantidad di habitante lo crece vooral esnan di edad mas halto. Tambe tabata conoci cu mester a enfoca riba e cuido primario cerca dokter di cas pa evita aumento demasiado drastico di gasto di salubridad. A sosode cu e “opleiding” mescos cu a sosode cu Dump. Si a haci esaki un prioridad awe nos lo tin por lo menos 40 dokter di cas ARUBANO cla pa traha como tal.

E gobierno cu a sigui a deshaci di tur facilidad na dump y tambe a tuma pasonan directo pa desacredita e maneho riba terreno di salubridad. Kico ta e resultado? No ta gobierno ta esun cu lo sufri e consecuencia, pero e pueblo humilde. Awor na ImSan a nombra 3 dokter di cas. Cuanto di esakinan a sigui e “opleiding” como dokter di cas na Aruba??

Ta spera cu, si nan NO ta yui di tera, a mara nan na un tempo defini pa laga espacio pa nos propio hendenan ocupa e funcionnan aki den futuro!