Minister Dangui Oduber

Nos ta conmemora 2 aña di COVID-19 na Aruba

ORANJESTAD – Diadomingo ya ta marca dos aña caba cu Aruba a conoce su prome 2 casonan di COVID-19, Aruba a bira parti di e pandemia mundial y nos bida a cambia. Esaki tawata e aña mas duro den historia di pais Aruba. Un aña dificil cu a trese hopi stres, tension y intercidumbre. Nos tur a sinti e efectonan, Covid-19 a causa hopi destruccion den tur sentido di palabra. Pesey Gobierno lo conmemora e fecha di 13 di maart 2022 pa trece un reflexion riba tur locual pais Aruba a pasa aden, asina Minister di Turismo y Salud Publico Sr. Dangui Oduber a trece dilanti.
Minister Dangui Oduber tabata tin un rol hopi importante durante e pandemia mirando e carteranan di Turismo y Salubridad cu tabata esnan cu a wordo afecta directamente door di e pandemia. E mandatario conhuntamente cu ful e Crisis Team, conseho di minister y bou liderasco di Minister-President a haci tur locual tawata den nan alcanse pa cuida y proteha e comunidad di Aruba.
Pa prome biaha den historia, Aruba a conoce un toque de queda, shelter in place y un lockdown na nos frontera. Tabata desicionnan dificil pa tuma, pero mester a pone bida di hende prome sabiendo cu esaki ta bin a cambio di nos economia. Gobierno semper a haci su maximo esfuerso pa trece e balansa entre salubridad y economia. Hopi tabata esnan cu a perde nan trabou debi na e pandemia y ta esnan cu a perde nan sernan keri debi na Covid-19. Aruba a conoce 5 ola durante e temporada di pandemia cu a trece hopi stress riba salubridad y tambe nos economia.

Gratitud
Di curason Minister Oduber ta gradici tur esnan cu ta traha den cuido. Danki na boso esfuerzo y compromiso pa brinda un excelente cuido y servicio na patientnan. Danki na tur frontliners cu tatwata na trabou percurando pa Aruba por keda draai. Minister Oduber ta gradici tur coleganan di su ministerio, su coleganan minister di Gabinete Wever-Croes 1 y 2, miembronan di crisis team, departamento di Salud Publico y specialmente na comunidad pa e comprension y disciplina demostra den e 2 añanan aki.
Aruba a demostra union durante e pandemia pa combati esaki.
Durante e temporada di pandemia:
• A percura pa aumenta e cantidad unidad den den nos Intensive Care Unit (ICU) y percura pa busca extra personal di AMI for di Hulanda pa traha. Na un momento tabata tin 33 unidad di ICU activo. Awor despues di e pandemia ta bay expande e capacidad di nos ICU na 16 cama y cu e personal necesario riba nos propio forsa.
• A percura pa bin cu Aruba Health App cu tabata esencial den e recuperacion di nos turismo den medio di un pandemia. Cu e app aki turistanan y localnan cu ta yega Aruba ta download e app y ta haya tur informacion di nan PCR test dentro di 6 ora den manera digital. Aruba a wordo reconoci mundialmente pa nos protocolnan, nos innovacion y sigur e Aruba Health App. E mesun aplicacion aki a wordo por uza pa registra pa haya bo vacuna.
• A percura pa e introduccion di e Aruba Health & Happiness Code. Aki ATA a prepara e Aruba Health and Happiness Code, a percura pa certificacion di tur e establicimentonan caminda nan ta demostra na e turista cu nan establicimento ta cumpli cu tur rekisitonan di COVID-19, manera un bon higiena y proteccion. Esaki a sirbi como un punto importante di mercadeo cu a mustra e turista cu Aruba ta un destinacion sigur pa cu COVID-19.
• A percura pa bin cu un plan nacional di vacunacion pa tur habitante di Aruba tin acceso pa haya nan vacuna. Danki na esaki mas di 80% di Aruba su poblacion a ricibi nan vacuna cu awe nos por a sali di e pandemia aki.
• A percura pa introduci y ehecuta e Exit Strategy pa bolbe bek na normalidad cu tur precaucion y risiconan calcula.

Minister Dangui Oduber ta gradici comumidad di Aruba pa nan pa nan pasenshi y disciplina durante 2 aña hopi dificil. Hunto nos lo sigui vence e pandemia aki. Ban sigui vacuna Aruba, ban sigui salba bida y ban prospera. Finalmente Minister Oduber a bisa cu Covid-19 a pone nos tur para keto y reflexiona con nos mester balora tur loke nos tin riba e pais aki. Aruba ta bay bounce bek, Aruba ta un pais resiliente, fuerte y den union, paz y harmonia nos lo mira bek un futuro briyante pa un y tur cu ta biba riba e pais aki.