Minister Maduro di Finansa ta informa: Compania di rating Standard and Poor’s ta ‘upgrade’ Aruba su rating di ‘stable’ pa ‘positive’

Recientemente Minister Maduro di Finansa a haya e grato noticia cu e compania di rating Standard and Poor’s (S&P)ta ‘upgrade’ Aruba su rating di ‘stable’ pa ‘positive’ despues di haci nan evaluacion financiero di Aruba na februari ultimo. Esaki ta un bon noticia cu ta complementa e bon noticia ricibi di e compania di rating Fitch kende tambe a ‘upgrade’ Aruba su rating di ‘stable’ pa ‘positive.’

Den su rapport S&P ta menciona cu tin un chens grandi, di 1 entre 3, cu e rating di Aruba lo bay conoce un subida tambe den e aña nos dilanti. Esaki ta un hopi bon noticia, ya cu ta muestra di e recuperacion di Aruba su credibilidad financiero den gran forma.

Mester menciona cu S&P mescos cu Fitch ta reconoce e trabou serio y grandi cu a wordo haci pa Gobierno di Aruba pa atende cu e retonan financiero di Aruba, na unda cu ta sali foi un situacion di deficit pa produci surplus, y ta percura pa baha e presion di e debe riba e finansa publico di Aruba.

Minister Maduro ta gradici e team di S&P, e team di Aruba lidera pa Departamento di Finansa y tur otro instancia y persona cu tabata envolvi pa a haci e evalucion financiero y economico aki di Aruba un realidad. E rapport por wordo mira via https://disclosure.spglobal.com/ratings/en/regulatory/article/-/view/type/HTML/id/3140662