Cultura Education

MINISTER XIOMARA MADURO TA FELICITA GANADONAN DI COMPETENCIA ESCOLAR DI BAILE Y FOTOGRAFIA – DIA DI HIMNO Y BANDERA 2024

E aña aki Ministerio di Cultura conhuntamente cu Comision Celebracion Dianan Nacional  a organisa un competencia di baile di e jingle, “Aruba, Orguyo di nos tur”, na unda cu klasnan di scol basico  mester a crea un baile riba e jingle cu a ser componi y aregla pa e hoben talentoso Rygel Isabella y cu a wordo canta pa e hoben Jetzenia Martines. Ademas di esaki a organisa un competencia di fotografia pa muchanan di scol basico y scol preparatorio.

Ganado di Competencia di Baile Aruba Orguyo di Nos Tur:

Advertisements

Varios scol a participa den e comptencia di baile. E ganado di e competencia baile a resulta e muchanan di Scol Basico Prinses Amalia – Klas 4B, kendenan a presenta un bunita baile.

Ganado Scol Basico Competencia di Fotografia Aruba Orguyo di Nos Tur:

E ganado a resulta e hoben Hayzey Arends di klas 4b di Colegio Conrado Coronel. E potret ganado a wordo describi como lo siguiente: “Mi Aruba stima, ki orguyoso mi ta di tin bo como mi hogar. Cu orguyo mi ta comparti mi cas cu hopi bishitante, cu kier bin admira bo beyesa sin igual. Nos beachnan precioso y nos hendenan caluroso ta haci cu Aruba ta keda e Isla mas gusta y bishita. Na mi Isla e subida y bahada di solo ta algo fenomenal”.

Ganado Scol Preparatorio Competencia  di Fotografia Aruba Orguyo di Nos Tur:

E ganado a resulta e hoben Emmanuel Garcia di Scol Preparatorio Cayena. E potret ganado a wordo describi como lo siguiente: “Mi ta sintimi orguyoso di e bunitesa di nos lama color blau scur bunita , cu ta rondona nos isla. Danki na e lama bunita aki nos tin hopi turista cu ta bin di afo pa disfruta di nos dushi isla. Mi Aruba stima mi ta orguyoso di bisa Arubiano mi ta”.

Minister Xiomara Maduro y Comision Celebracion Dianan Nacional ta gradici tur scol y muchanan pa a participa den e competencianan, como tambe danki na e docente y mayornan pa motiva y brinda ayudo na nos muchanan, pa asina nan balora y aprecia mas Nos Dia Nacional, Dia di Himno y Bandera y asina sigui sinti nan mes orguyoso di ta Arubiano. E simannan nos dilanti lo tuma tuma contacto cu scolnan pa asina por entrega premio na e ganadonan.